UK Parliament nih NUG Theihpi Ding in UK Cozah a Forhfial

UK Parliament nih NUG Theihpi Ding in UK Cozah a Forhfial

UK Parliament nih Myanmar phungning cozah ah NUG theihpi ding in le SAC hi official cozah bantuk in siter lo ding in UK cozah sin ah forhfialnak a tuah, tiah VOA nih nihin zaanlei ah a ttial.

UK parliament nih NUG theihpi ding in a halnak kong cu UK ramleng vuanci zung nih cathanh a chuah i, “Myanmar ramchung miphun vialte buaktlak covo tinco ding timi NUG dirhmun kan hmuh caah atu bantuk in kan forhfialnak a si,” tiah a langhter.

Cu lawng si loin “NUG hi hmailei Myanmar ram cozah ah ruah buin pehtlai a herh bantuk in uknak a ramhtu ralbawi pawl kan dirpi hna nakhnga lo abiapi tuk,” tiah cathanh ah an langhter chih.

Cun, Myanmar innpa ASEAN ram pawl he kutsih in rianttuan tik ah Myanmar ramchung i ramkhel thongtla pawl thlah an si nakhnga kan chimrel zong a hau tiah an ttial chap.

Myanmar ralkap ralhriam cawk/zuarh phihkham khawh a si nakhnga UK nih a hruaimi ralhraim phitkhamtu bu ser ding zong in UK cozah sin ah forhfialnak an tuah.

SAC nih NLD kut cung in uknak an chuh hnu ah UK nih Myanmar ralbawi tampi dantatnak a pek cang hna i kanhnu July 6 zong ah khan Min Aung Hlaing le Soe Win dantatnak a rak pek chap hna.

The Chin Journal
July 16, Yangon
==

Thawngdang Relchap
Hakha ah COVID-19 Positive Minung 11 Hmuh Chap Hna

Nihin (July 16) Hakha ah minung 59 checknak an tuah hna i minung 11 sinin COVID-19 zawtnak an hmuh.

Dawrthar in minung 4 le Khuathar in minung 7 sinin COVID-19 zawtnak an hmuh hna hi a si.

The Chin Journal
July 16, Hakha
(Secretary, HTMF)
=====

Thawngdang relchap
Thantlang Penguk Inn pawng le Hmun dangdang ah Bomb an Puak

Nizaan zaanttim sml. 12:30 hrawng ah Thantlang khua ah bomb puahnak voi 4 a chuak, tiah Thantlang khuami sin in kan theih.

Bomb a puahnak hmun hna cu Thantlang penguk (အုပ်ချုပ်ရေးမှူး) inn pawng, Town Hall pawng, peng fimcawnnak zung pawng le chaklei kam hmun pakhat an si hna.

Bomb a puah bantuk in meithal puah thawngpang voi 5 leng zong pehzul in a thang.

Bomb puahnak ruang ah aa hliammi an um lo. Zei bantuk bu nih bomb puahnak an tuah timi zong fiang in theih a si lo.

Nihin zong ah Thantlang khuachung in meithal puah thawngpang kan theih len, tiah Thantlang khuami pakhat nih The Chin Journal ah a chim.

The Chin Journal
July 16, Thantlang
===

Thawngdang Repchap
Hakha ah Meithal Puah Thawng Pehzul in a Thang

Tu zaan sml. 11:40 hrawng ah Hakha, BOC hrawng in meithal puah thawng voi 7 hrawng a thang.

“SAC ralhrang nih an puahmi a si ko lai,” tiah Hakha khuasa pakhat nih a ruah ning a chim.

The Chin Journal
July 16, Hakha
==

Be the first to comment

Leave a Reply

Your email address will not be published.


*