UN Nih NUG Cozah Cohlan Dingin Vawleicung Ram Hruaitu Minlang Cheukhat Nih Minthut In Halnak An Tuah Ve

UN Nih NUG Cozah Cohlan Dingin Vawleicung Ram Hruaitu Minlang Cheukhat Nih Minthut In Halnak An Tuah Ve

UN nih NUG cozah cohlan dingin ram hruaitu minthang le ramkhel thiamsang cheukhat hna nih minthut in halnak an tuah tiah theih a si. Cuti minthut in halnak a tutu hna cu vawleicung laksawng nganbik Nobel Peace Prize a rak hmutu East Timor president hlun le vawleicung huap Democracy movement hruaitu Jose Ramos-Horta, Myanmar ah US palai a rak tuanmi Derek Mitchel, Switzerland ram National Council chungtel le Swiss-Myanmar pehtlainak chairman Ms. Laurence Fehlmann Rielle, Czech Senate ramleng pehtlaihnak le runvennak committee chairman Pavel Fisher, Portugal ram in Europe Parliament palai hlun Ana Gomes၊ Reporters Without Borders in Deputy Director General Antoine Bernard hna an si.

Hi vawleicung ram hruaitu minlang hna nih hin vawlecung hmunkip ah a ummi Myanmar rammi 156000 renglo hna he UN nih NUG cozah a cohlan nak dingah Online in minthut cawlcanghnak ah an min a thut vemi a si.

UN nih NUG cozah a cohlan nakhnga minthut singhnih hmuh dingin i timh a si i atu hi 156721 a tling cang. Hi online minthutnak ah Myanmar rammi a si mi nih cun i tel ve hrimhrim ding a si. Minthut a duhmi nih a tanglei link ah luh in minthut khawh a si.
===

Thawngdang
PDF le tlangcung hriamtlai phu i fonh in ralhrang kan doh lai tiah an thanh

Shan ramkulh chaklei ummi SS-PDF, Kayinni hmun Phekhung PDF,Moe be(မိုးဗွဲ) PDF, Loikaw PDF, Demawhsu PDF, Naypyidaw PDF phu 6 hna cu hmunkhat ah ralhrang doh ti ding in dirh an si cang, tlangcung hriamtlai EAO hna he pehtlaihnak tuah in hmunkhat ah ralhrang phu doh in an hraam chahdih tiang kan doh lai tiah August 16 ah cathanh an chuah.

Hmunkhat ah a dir ti mi PDF phu 6 hna cu mipi lei dir in dirh mi a si i, mipi hna ruahnak le mipi duhmi kha a hlei in ruah le tuan a si lai, CRPH,NUG nih a langhter mi biakamnak 4 ning in zulh le tuah a si lai tiah theih a si.

Atu ah Shan-Kaya ramri Phekhung peng chung ah ralhrang phu hna nih thazaang tampi hmang in kahdohnak an tuah ,Kayinni ralkap KA,KNA le Phekhung PDF, Moe be PDF, Demawhsu PDF phu hna cu hmunkhat ah i fon in ralhrang cu an doh ve hna.
====

Thawngdang
Mandalay ah Covid-29 zawtnak in zarhhnih chungah 400 hrawng an nunnak a liam

Mandalay ah August ni 1 in ni 14 tiangah Covid-19 zawtnak in nunnak a liam mi hi minung 400 hrawng an si tiah Mandalay khuachung mibawmchan tu phu nih an chim.

Mibawmchan tu phu in rianngei pakhat nih”tuthla ah hin nikhat ah minung 20,30/40 hrawng hi an nunnak a liam, zarhhnih chungah a thi mi hi 400 hrawng an si lai” tiah a chim.

Mandalay ah August 16 ni ah Covid-19 zawtnak ngeimi le lunghrinh mi mizaw minung 9 an nunnak a liam tiah khuachung mibawmchan tu phu khat hna bawmhnak in theih a si.

Covid-19 zawtnak ruangah nunnak liammi hna cazin cu Mandalay khuachung mibawmchan tu phu cheukhat hna bawmhnak in tuahmi an si.

Nunnak a liam mi hna tamdeuh cu kum upa i zawtnak phun dang hna a rak ngeicia an si, sii-inn ah i zohter kho lo in le, sii-ai ah harsat nak tong mi, oxygen chambau ruang ah nunnak liam mi hna an si.

Mandalay ah a luancia mi July thla nikhat ah Covid-19 mizaw 80 leng tiang nunnak liam nak a rak um, July thlakhat chung ah Covid-19 zawtnak hmuhmi le lunghrinh mi 2000 Leng an nunnak a liam tiah mibawmchan tu phu cazin ning ah theih khawh a si.
====

Thawngdang
Yee(ရေး) peng ah pyusawthi chungtel pakhat meithal in kahthah a si

Mon ramkulh,Yee peng chung Asin(အစင်)khua phungki sianginn pawngah August 16 zaanlei suimilam 6 hrawngah Pyusawthi phu chungtel pakhat cu meithal kahnak in a thi tiah khuami pakhat nih a chim.

A dum a kal lio ah a ho si ti theih lo mi hna meithal kah a tong ,a hliam hma he sii zung aa phak hnuah a thi tiah a chim.

Asin Sanpiah(အစင်စံပြ) khua um kum-50 luan si mi U Ko Ko cu khuachung mi hna caah ralhrang lei tang mi pyusawthi chungtel pakhat zong a si tiah khuami hna nih an chim.

Yee(ရေး) peng chungah ho si ti theih lo mi hriamtlai hna kahnak ruang ah nunnak liam mi minung 5 tiang an phan cang,cu nunnak liam mi hna chung in khuabawi le ralhrang lei rianngan pakhat zong an i tel.

Cu kong he pehtlai in zeibantuk hriamtlai phu hmanh nih thawngthanh in langhternak a um rih lo.

Yee(ရေး) khua mipi vengtu phu PDF nih ralhrang phu lei dirkamh in riantuan mi hna cu ralrin ding in an ti hna,mipi lei he hmunkhat ah i fonh uh, ralhrang phu lei palik zong CDM tuah uh tiah ralrinnak an chimh hna.
===

Thawngdang
Minelar khua chungah ngandamnak kong minthut um lo in a um thu mi cu tangka liam a si lai

Shan ramkulh nichuah lei hmun 4 Minelar peng chung ah angan a dam ko tinak ca minthut ngei lo bu in a umthu mi cu tangka liam a si lai tiah an thanh.

Covid-19 zawtnak a karhtuk mi hi i runven khawh nak ding caah khuachung ummi hna nih nan hlaan mi innkhaan in a dang inn khaan ah i thial, Hotal le khual riahbuk hna ah riah nan duh ahcun hmun 4 ngandamnak minthut le mah pengchung khuauk bawi zung minthut ca lak ding a si lai.

Kanmah he a pehtlai mi khuabawi zung i lungtlinnak minthut ca a um lo bu in a umthu mi theih nan si sual ahcun tangka liamter a si lai tiah August 15 ni ah Minelar phu nih theihternak an tuah.

Minelar khua cu Myanmar – Taluk ramri khua pakhat a si i Casino, phaisa in lentecelhnak, rithai sii,i zuarnak, sahrang saram chungchuak thil chawleh thalnak, khualtlung kal hna le mi tampi nih theih nak hmun a si.

Tulio pulrai ruangah Taluk ram nih Myanmar ram mi cu an auh hna i ramleng chuahnak nawl an phih ruang ah Minelar khuapi ah chawleh thalnak mithmuh in a zor thluahmah tiah khua mi hna nih an chim.

Shan nichuak lei hmun -4 hmunhma cu rallokap he deihnak a la mi (NDAA)nih a runven mi asi.
===

Thawngdang
Haiti Lihninh Ruangah Nunnak Liammi 14,19 An Si Cang

Kan hnu zarh August 14 zarhte ni ah magnitude 7.2 in Haiti ah lihninh ruangah chanhchuahnak rian cu tuan cuahmah rih a si i,atu tiangah nunnak liammi 1,419 an si i, hliam a tuar mi 6,900 leng an si tiah theih a si.

Atu hi thli le ruah tampi a sur ding dirhmun a si caah chanhchuahnak rian zong rianrangin kalpi a si.Lihnin nih inn, sianginn le biakinn hna tampi a hrawh i, minung 30,000 cu inn le lo ngei lo in an um i, bawmhtu phu hna nih umnak inn le dinti an herh ngai tiah an chim.

Chanhtu rian hi American le Chile nih an bawmh hna pin ah Cuba sii lei thiam mi hna zong Haiti hi an phan cang tiah theih a si.

Lihnin nih Haiti ram nitlak thlanglei Les Cayes khuapi cu fak piin a hrawh tiah theih a si.

Apple company chief executive officer Tim Cook nih Haiti lihnin ruangah a rawk mi inn le lo hna dirh than nak ding le chanhchuahnak caah kan bawmh lai tiah twitter in a thanh ve.
Ref; bbc
==

Paletwa sii-inn ah conghhranh mi Paletwa,Myoma veng i a ummi U Hia Hlua (kum 102) cu Covid in ni 10 a zawt hnu ah a dam than.

The Chin Post

Be the first to comment

Leave a Reply

Your email address will not be published.


*