US Nih Afghanistan I A Minung Hna Lak Dingin Ralkap A Fial Lai

US Nih Afghanistan I A Minung Hna Lak Dingin Ralkap A Fial Lai

Afghanistan ralkap le Taliban pawl kahdohnak cu a fah chin lengmang caah US nih Afghanistan khuapi, Kabul ah a ummi US embassy riantuan hna hruai dingin ralkap 3000 fial a timh.

Mah ralkap pawl nih embassy riantuan hna lengah US special immigrant visa (SIV) a hal mi hna cu an hruai chih te hna lai.Embassy belte cu hon rih a si lai tiah state department thawngthanhtu Ned Price nih a chim.

Pentagon press secretary John Kirby nih a tuhnu suimilam 24 in 48 chungah US Army battalion pakhat le Marine battalion pahnih cu Kabul ah a um mi Hamid Karzai airport an lut cang lai.

Kan ralkap hna hi Afghanistan ah sau an cam lai lo, an um chungah kahdoh an ton a si belte ahcun fak piin leirulh ding an si lai. Kan ralkap nih American mi hna cu airport tiang an ven hna lai.US nih Afghanistan ah a um mi an ram palai hna ven dingin ralkap 650 cu chiah peng a si.

Kabul, US embassy nih an mi hna cu Afghanistan chuahtak dingin August 12 ah khan a thanh cang. US special visa tangah Afghanistan 20,000 caah visa on piak a si lai theih a si.

Britain zong nih Afghanistan ah a ummi an mi hna hruai dingin ralkap 600 hrawng fial a timh tiah theih a si i, embassy le aid group dang hna zong nih an mi hna an hruai lio a si tiah theih a si.

Taliban hna nih Afghanistan province khuapi zeimawzat an lak hnuah an ram i khuapi ngan bik pahnihnak Kandahar zong kan lak cang tiah Taliban nih an thanh.

Kandahar airport hi Afghan ralkap hna kut ah a um rih. Mah hmun hi US nih Afghanistan ah kum 20 chung mission an ngeih chungah ralkap hmunpi nganbik changtu a si.
Ref; cbs news

Be the first to comment

Leave a Reply

Your email address will not be published.


*