Van Chiat Ah Van That : Myanmar CDM Palek An Umnak Inn Mawtaw Ngan Nih A Pah, Bawhte Pakhat Telh In Minung 8 Hliam An Tong

CDM Palek An Umnak Inn Mawtaw Ngan Nih A Pah, Bawhte Pakhat Telh In Minung 8 Hliam An Tong!
============

Van chiatlei ah van tthat bak an si e a thi ding bak khi an si ko nain an nunnak cu a him. Mizoram ramkulh, Phuncawng khua ah Myanmar CDM palek chungkhar an umnak inn pahnih cu June 3, zanlei 6:00 pm hrawngah khan mawtaw ngan (kungka) nih a pah i a cim dih tiah theih a si. Hi inn pahnih ahhin chungkhar pali an um i cu chungah chungkhar pahnih cu Myanmar CDM palek an si.

Inn cimh ruangah mining 8 hliam an tuar. Aizawl siizung ah an tlikpi colh hna. Pasarih cu siizung um an hau lo, pakhat tu cu a fah ngai caah siizung an thlop cuahmah. Phuncawng khua hi Aizawl in meng 9 hrawng a hlatnak ah a ummi a si. Inn a pahtu mawtaw zong cu hawrkuang ah a tla.

Siizung ah an thlopmi cu CDM palik chungkhar an si. CDM palik hna an fa bawhte zong a lu a kuai. Inn pah a tongmi hna cu Phuncawn khua i sianginn ah hmunhma an serpiak chung hna tiah bawmhchanhnak ah aa telmi Lai Christian Fellowship hruaitu pakhat nih a chim. The Chin Post

thawngpang dang relchap : Good News : PDF Kaamlo Pasal Tha Pawl Nih Kawl Ralhrang 11 An Hnuai Hna

Sagaing Ramthen Katha Peng SAC ralkap le PDF-Katha kahdohnak ah SAC ralkap aa hliam mi pawl an thi than i minung 11 a thi mi an si cang, a thi mi lak ah Palek an tam bik. Sagaing Ramthen Katha Peng ah May 30 ah khan PDF-Katha le kawl ralhrang hna karlak fak ngai in kahdoh nak a rak chuak.

Cu kahdoh nak ah cun PDF-Katha nih kawl ralhrang lei zeimawzat an rak thah hna pinah hliamtuar zong an rak um hna i cu hliamtuar vialte hna zong cu an thi dih than caah an dihlak in kawl ralhrang lei a thi mi hi 11 an si tiah thawngpang fiangtein an rak langhter than.

Katha peng kahdohnak ah hin PDF-Katha leiin minung 5 an nunnak a liam ve caah an ngaih a chia tuk hringhran. Asinain kawl ralhrang lei zongin tamtuk an rak thah hna pinah fak ngaiin hliantuar mi zong an rak um hna i cu hliamtuar pawl cu tuchun tiangah an thi than cuahmah hna tiah thawng theih a si.

Katha peng kahdoh nak i a thi mi hna lakah hin palik an tam deuh tiah an langhter i cu palik pawl a thi mi hna cu Katha peng Cauh TUng Kyi palik sakhan ah a um mi pawl palik bawi pakhat zong a thi ve tiah thawngpang fianter nak ah cun an rak langhter ning a si. Ref: The Hakha Times

Be the first to comment

Leave a Reply

Your email address will not be published.


*