Zaangfak Tuk A Si Ai E Maw Ka Thin Aw : Bawmhtu Ngei lo Kum 18 Nute nih A mah tein A nu Ruak a Vui

Mah thil hi India ram Bihar, Araria pengkulh Bishanpur Panchayat khua ah a cang mi thil a si. Kum 18 lawng a si rih mi nungakno Soni cu Covid-19 ruangah a pa nih a thi tak hnu Ni 4 ah a nu nih a thi tak than. A nu ruak vui nak ah hin khuami pakhat hmanh an rak chuak lo pin ah a nu ruak meikhanghnak ding phaisa a ngei lo caah a mahte in vulei a cawh i a nu ruak cu a vui.

Media pawl nih an tarlang ningah Soni nih a nu Priyanka Devi ruak cu vui pi dingah khuami cu a sawm hna nain pakhat hmanh nih bawmh an timh lo caah a mah te bak in PPE thuam a hruk i a nu ruak cu a vui hi a si.

Soni te unau hi 3 an si, a changtu hi Nitish Kumar um 14 mi le a hniang cem hi nu a si i Chandhi tiah an auh. Kum 12 lawng a si caah a naule zohkhenh le an chungkhar pawcawmnak cu a mah kut ah a hngat ko. Thil mak ngai mi cu Soni nih a nu ruak a vui hnuah an khuabawi sinah phaisa cawiin ruakvui pumhnak a tuah mi ah khuami 150 leng nih rawl an rak ei ve tiah a chimh.

Soni pa hi Birendra Mehta a si i an khuaah Siidawr a hngak ton mi a si. A pa Covid zawtnak a ngei tih an theih hnuah a pa zohkhenhnak caah an ngeihchia satil vialte zong an zuar dih caah a nu a vun zaw ve tikah i zohkhenhnak caah zeihmanh ngeih mi zong an ngei ti lo tiah theih a si.

Soni te chungkhar an sining hi social worker Prabhat Yadav nih a theih le cangka in a si khawh chungin a tanpi nak thawngin cozah nih tanpi zong an pek. Zarhkhat chungah Nu le Pa nih nunnak an liamtak mi an chungkhar ngaichiat an tuar lai ning cu kaa in chimh thiam a har hringhran ko lai. Ref; navbharattimes. Credit : thechinpost

thawngpang dang : Khah Hakha CDF Nih Mipi A Ranak In Khuain Chuak U An Ti Cang Hna, CDF Nih Chuak U An Ti Mi Khua Nu Khau Pa Pawl Hna Cu

Hakha CDF nih mipi sin ah thawngthanhnak zulhphung 5 an tuahmi cu a tanglei bantuk hin a si i a tu lioah hin kan ram le kan miphun nih a dikmi uknak kan hmuh khawhnak dingah tiin kawl ralkapu uknak cu hnu pil loin kan doh cuahmah lio a si i cu bantuk in kawl ralkap zong nih a phun phun in an kan kham. Cun mipi lei zong nih kawl ralkap a bawmtu zeimaw an um timi thawngpang a um caah hi thawng thanhnak hi kan tuahnak a si tiah an chim.

Thawng an thanhmi a pakhatnak ah CDM a si lomi paoh cu Hakha khua chungin a rannak in chuak u. A pahnihnak cu kawl ralkap nih rian a lawngmi ah rian ttuan dingin sawmnak an tuahmi ah a kalmi cu miphun leirawi nan si. A pathumnak ah WiFi a hmangmi hna nih kawl ralkap WiFi a simi Mytel WiFi hi hrial dingin kan in nawl hna. A palinak ah kawl ralkap nih an zuarmi thilri cawk lo ding. A panganak ah kawl ralkap uknak tangah a ummi company hna kha pumpak chawlet hna nih va pehtlaih lo ding.

Chin capar rel ding a um chap. Lam A Tlaumi Vanmi Part-1: Newspaper catlap ah rian a lawngmi an chiah chihmi cu din loin ka zoh i rian ka kawlnak ah suimilam zoh zong thei ti loh. Alarm ka chiahmi zinglei suimilam 4 cu a van awn i cu bakin cun zinglei pei a si cang hi tiah ka van theih ceo a si. Ka thawpi cu ka chuah i tu zan caah cun za rih seh tiah ka ti cu ticun ka mit benh cu kai phoih i cabuai cungah ka chiah. Ruah nih cun din loin a sur i ka umnak inn cung cih cu ruah fang nih a peh peh in an tlak ko hna. Zei a si paoh ah thaizing ah ka hawipa Edward nih rian pakhat khat a hmuhmi cu a um theo te lai i cu cu ka hngah a hau rih ko. A tu cu ka it phawt ve rih lai tiah biachahnak cu ka lung chungin ka tuah. Rian loin ka um hi a sau cang i a um ciami phaisa zong a dih lei a panh cuahmah cang. Keimah bantuk catang ngei ve lo caah cun rian hmuh hi a fawi lo ngai bantuk in rian hi i thim awk a tlawm. Cu ti a si caah rian hi chun zan in ka kawlnak hi a si.

A donghnak ah ka thawpi cu ka chuah i tuzan caah cun za rih seh ka ti i cu ticun ih zai cu ka rel i it kai timh lio bak ah ka room inn hnu lei ah kutka cu fak ngaiin ai awn thawng cu ka hei theih. Ka lau ngaingai. Ruah nih le a tuk tuk ttek nih a tla pah fawn. Mithla hlah maw si tiah khin ka hei ruat pah. Ka dai thlang ngai ruah sur lakah ka hawipa inn in ka rak lawi caah inn hnulei kutka cu ttha tein ka rak hrenh ta lo timi kha ka hung theih.

Thlitu nih kutka a hranh caah kutka cu a mah le a mah ai khak i a si lai tiah ka ti i va hrenh dingin ka tho i ka hei kal. Inn hnulei kutka cu a rak i awng taktak i thli zong cu a hrang tuk lem lo caah zei nih dah a awnter ti hi ka ruat pah. Cun kutka hram ah minung kalnak a cinmi keneh hna cu ka hmuh caah ka lau ngaingai ko. Cu lioah ka ke bakin kut pahnih nih a rak ka tleih i ka lau tuk caah ei ka nu tiah ka au. Ka ke cu ka van zoh cu minung pakhat nih a kut hnih in a rak tleih ko cu ka hmuh. Ka hmai ah cun a khuk ai bil i a sam a sau ngaimi a lu cu tang ah a khun.

Ka ke cu fek tein a tleih i a kut cu a ther pah. Zaangfahnak tein na inn ah ka dorter ko mi dang cu an inn kutka ai hrenh dih cang le hi ti hin cun ka thi lai tiah aw ther ngaiin a chim. A aw ka theih bakin nu a si timi cu ka theih i zei dah hi tluk tlai ah nu nih cun hi ti hin a um tiah ka ruat colh. Saupi khua ruat ti loin a poi lo a ngah ko ra ra inn chung ah na thil hna an cin dih kha nai thleng la ka ti i a liangin ka tleih i ka thawh. Cun inn chungah ka hruai. Inn chungah kan lut i ka ihkhun cungah ka tthutter. Cun a rannak in ka hnipuan a lummi cu ka chuah hna i a pawngah ka chiah piak.

A lu cu ai khun peng caah sam nih a hmai cu a huh hna i fiang tein ka hmu kho loh. Hi hi i thleng mu coka ah rawl ka ser la tiah ka chimh. Cun coka ah ka kal colh. A chim lawng ka chim rawl hleimi zong a um loh. A thar in chumh a hau ko ka ti i rian rang taktak in rawl chumh cu ka thawk. Kai rian ranh tuk ruangah facang cu ka thlek sual i coka ttuang cungah cun an i tthek hna. A rannak in ka khuk kai bil i ka ruh hna. Cu lioah innpi lei cu ruah lo piin ka hei zoh duk sual.

Ei ka nu tiah ka au i ka lau tuknak ah hnulei bak ah ka vai hlonh ko. Innpi lei ka zoh ah khan a ke cu ka hmaika te bak ah ka hmuh caah a si i movie chung mithla hna khi a lo pah. Zei hmanh a chim loh i coka ah a rak lut ve. Cun a dir i khua a hoi a hoi i apple pum khat a tangmi cu a lak zau i a kawk pah in innpi ah a kal tthan. Cun apple cu a ei pah in rawl tuah ti duh hlah hi hi kai za ko tiah a kal pah in a ka chimh. Ka tthunak in ka tho kho rih loh i a tu tiang ka launak a dam rih taktak loh. Duhsah in ka tho i zei thil hme a cang tiah keimah le keimah cu ka lung chungin kai hal. Ka zan mang bantuk khi a lo nain a taktak a si fawn ttung. Ka hei zoh i apple cu ihkhun cungah a tthu pah in din lo bakin a ei thluahmah ko cu ka hei hmuh. Ka room hi a bi ngai le rak ka theithiam ko law mu nang ihkhun ah it law kei coka ah ka it lai tiah ka ti.

Apple cu thaw tukin a ei caah ka chimmi bia cu a ngai le ngai lo zong ka thei loh. Innpi cu ihkhun a khat cang caah ttuanglai ah it zongah hmun khat ah a itmi bantuk kan lo cang caah coka ah it hi a ttha cem tiah ka hmuh. Hmun dang cu ihnak a um ti lo bantuk kha a si ko i cu caah coka hi minung pakhat ihnak caah cun a za tthiamtthiammi kha a si ko. Cu ticun apple duk tla tukin a ei ti ka hmuh tikah duhsah in ei ko seh ka ti i a ei dih caan hngak ti loin coka ah cun puan ka phah i ka ih taak. Edward nih rian a hmuh sual ahcun zingka teah rian interview tuah a hau lai caah tuan a tuah it ka hau cang.

A thil eimi cu a mah ei in rak ei ko seh law a mah it in rak it ve te ko seh tiin ka ih taak. Zingka cu a hung si i ka ihkhun cungah ka it ko cu kai hmuh. Are a ziah nizan thil a cangmi kha ka zan mang maw a si kun ne tiah ka lung chungin bia kai hal. Cu lioah nu a nih aw thawng ka theih i ka van i her i ka zoh tikah cun ka hman ti lonak a sau tuk cangmi tv hlunpi hmaika ah tv a hmu bal lomi bantuk in tv thlalang cu neih taktak in tthep loin a thu i tv a zohmi zahan ka khualnu cu a si ko. A hnulei a ka chit i cawl lo tein bakin tve cu a zoh ko.

Be the first to comment

Leave a Reply

Your email address will not be published.


*