Zeicaah dah Pathian hi kan biak?

Zeicaah dah Pathian hi kan biak?

Dawtmi u le nau hna kan hnu ah zeicaah dah Pathian hi kan biak tiah biahalnak ka rak tuah i pum pakin Bible nan hmuh dan te cio in lehnak zong nan van tuah caah kaa lawm tuk. Cu bantukin keimah zong nih Pathian kan biaknak kong hi ka hmuh dan tein van langhter ka duh. Cu kong cu zoh ti hna u sih..

Dawtmi u le nau hna Pathian cu dawtnak a si ( 1Johan 4 : 8 ) bantukin cu dawtnak a simi Pathian nih cun sual in a khat cang vawlei ah hin a dawtnak cu a takin a langhter. Cucaah Jesuh nih, “Pathian nih vawlei hi a dawt tuk caah a Fapa ngeihchun te kha a pek. Cucaah amah a zummi paoh cu an thi lai loh zungzal nunnak an ngei lai,” tiah a ti. ( Johan 3 : 16 ).

Cu bantukin Fapa Jesuh Khrih kan zumhnak thawngin Pathian nih kan sualnak vialte kha a kan ngeihthiam lawng hmanh si loin amah fa hrimhrim ah khan a kan cohlan i cun a kan ngeihthiamnak le a fa i a kan cohlannak langhternak ding ahcun tiin a Fapa Thlarau zong kha a takin a kan pek. ( Galiti 4 : 4 – 6 )..

Cucaah cun zeicaah dah Pathian hi kan biak tiah cun a liannganmi a dawtnak kha vawlei minung hna kan cungah hin a takin a langhter caah hin a si tiin ka hmuh. Dawtmi u le nau hna nang le kei Jentail a simi cu Pathian hmanh a ngei lomi minung kan rak si. Asinain Pathian dawtnak cu a lianhngan tuk caah nihin ni ahcun Judah mi hna nih hnahchuahmi zong kha kan hung si cang. ( Rom 11 : 11 ).

Hi tluk in a dawtnak a liannganmi Pathian cu ahonih dah biak duh loin le thangthat duh lo in le sunparnak le liannhannak le upatnak pek duh loin a um khawh lai? Cucaah amah lawng a simi, a fimmi Pathian cu Jesuh Khrih thawngin thangthat si thluangthluan ko seh. Amen. ( Rom 16 : 27 )..

Khrih ah dawtmi u le nau hna kan Bawipa Jesuh Khrih thawngin a nungmi Pathian a ngeimi kan si hi cu mi vantha taktak kan rak si. Zeicatiah Pathian nih a Fapa in khamhnak a kan serpiak ( Hebru 2 : 10 ) lawng hmanh si loin kan biakmi Pathian nih a duhmi a Fapa Jesuh Khrih kan Bawipa a zummi vialte nih cun zungzal nunnak zong kan hmuh. ( Johan 6 : 40 ). Hallelujah.

Cu lawng hmanh si loin kan minung sinak in kan thei khawh rih lomi kan ralpa Satan doh dingin thangthat tlak Pathian, zeizong vialte cungah nawlngeitu, siangpahrang vialte Siangpahrang bawi vialte lakah Bawi chin nih cun a caan te ah Khrih cu a phuan than fawn lai. ( 1Timote 6 : 15 ).

Dawtmi u le nau hna kanmah tuah hau lo tein a dawtnak a sunglawi tukmi a nung kan Pathian cu bia awk tlak Pathian hrimhrim a si kha fian tein hngal hna u sih law Pathian cu Thlarau a si bantukin amah a biatu kan si taktak ko ahcun aman nih a kan pekmi kan thlarau dihlak in le kan thinlung dihlak i biataknak thinlung he a biami si hna u sih.

Zeicatiah Jeush zong nih Samaria minu sinah a rak timi cu, “Sihmanhsehlaw Pathian a bia taktakmi nih cun thlarau le biatak in an biak caan kha a ra lio i hika hi a phan cang. Hi bantukin a biami hna hi Pa nih a duhmi cu an si. Pathian cu Thlarau a si i a biatu hna nih cun thlarau le biatak in an biak awk a si,” tiah a rak ti. ( Johan 4 : 23 – 24 )..

Pathian nih hin amah biatu dingin sermi kan si lo nain amah Pathian hrimhrim nih hin bia awk tlak a sinak le thangthat tlak le sunparnak pek awk tlak le lianngannak le upatnak pek awk tlak a sinak taktak cu a takin hi vawlei sual in a tlu cangmi hna minung kan sinah hin a langhter caah hin a si.

Cucaah cun daw kaw zultu Johan zong nih, “Hihi dawtnak cu a si, Pathian kan dawt caah a si lo, amah tu nih a kan dawt i kan sual ngaihthiamnak thawinak caah a Fapa kha kan sinah a rak thlah. Ka fale hna, Pathian nih cu tluk in a kan dawt caah cun kanmah zong pakhat le pakhat kan i dawt awk a si. Ahohmanh nih Pathian an hmu bal lo, pakhat le pakhat kan i dawt ahcun Pathian kan chungah a nung i a dawtnak cu kan chungah tlinter a si,” tiah a rak ti khah. ( 1Johan 4 : 10 – 12 )..

Zeicaah dah Pathian hi kan biak?” timi bia aa hrawm khomi zumtu nan dihlak chungah dawtnak a simi Pathian cu a zungzal in pumpak nan cungah um ko seh..

Thank You For All;
Johnly Fambawl

Be the first to comment

Leave a Reply

Your email address will not be published.


*