ZEIRUANG AHDAH “MARTAR” MIN HI KA DIRPI MARTAR NUN NGEIMI TAMPI AN CHUAK LAI

ZEIRUANG AHDAH “MARTAR” MIN HI KA DIRPI MARTAR NUN NGEIMI TAMPI AN CHUAK LAI

Hakha khua i Țhanghnak a um cuahmah rih lio 2005 kum cheu hrawngkhan, BAWIPA nih, “Martar Min na dirpi lai,” a ka ti i, BAWIPA JESUH ka dawt i a țha ka ti ngai! Asinain, ka ngamh lo “Martar Min ka vaa bunh hnga i, BAWIPA caah zumhtlak loin ka hei um sual ko hnga; BAWIPA thangchiattu pei ka si ko lai cu,” tiah, ka ruah i ka rak duh lo.

Sihmanhselaw ka nunnakah, BAWIPA fialnak Aw cu a lo kho lo, a țhawng chin lengmang!
2006 kum, zankhat cu, chungkhar Crusade ka tuah i Johan. 3:16 hmangin PATHIAN Dawtnak ka chim cuahmah lioah, PATHIAN Zaangfah nak Khuaruahhar ka hmu i PATHIAN THIANG THLARAU cu faakpi in ka cungah a tlung!

Ka nunnak cu KHRIH Chungah Baptistma a si i JESUH KHRIH dawttuk ve ruang i, a ca i thih-nun ngamhnak nun cu a ka pek! Cu le cangka, BAWIPA le aa pummi hna hmaiah, Biakamnak ka tuah! “Ka lu in ka kechik tiang sehin an ka rial dih ding a si hmanhah, ka duh thimnak vialte BAWIPA sinah ka peek i ka thih ah siseh, ka nunah siseh, BAWIPA JESUH caah zumhtlak ka si lai,” tiin.

BAWIPA nih biahren/biakam pakhat le Cathiang pakhat a ka pek i, cucu, “Nangnih, ‘Martar min’ hi na dirpi lai i, Keinih ‘Martar nun’ a ngeimi mino tampi ka thawhter hna lai,” a ka ti. Cathiang a ka pekmi Johan 12:24 “Biatak kan chimh hna: Facang ci pakhat cu vawlei ah an tuh i a thihta lo ahcun pakhat lawng a si peng ko. A thih ta lawngah mu dang tampi a chuahter khawh.”

“Martar Min” ka rak dirpi hlan ahcun, BAWIPA nih a țhawnnakin a ka umpi tuk caah țhawngțhachim le PATHIAN Pennak rianah teinak ka hmu in ka tuahmi paohah ka lam a tluang ngaingai tawn. Sihmanhselaw, ” Martar Min” ka dirpi thokin, a țhawnnak in a ka hmang ti lo i, intuarnak leiin a ka hruai caah, hlawh chamnak, leiba ngeih i chamh khawh lonak, Miphun sualphurin ni 40 rawlulh harnak ( rawl ka ulh ahhin ka tem taktak), nupi thit le soisel thangchiatnak, Thawngțhachim awkah thațhawn ngai i khual tlawng kho lo in thlacamnak inn hngah pengnak, cu lio ahcun ka hawi le vialte Thawngțhachim ah PATHIAN nih a hman tuk hna! Sihmanhselaw law, BAWIPA nih Bia a ka kammi ruangah le hmailei ka hmuh lai mi Suiluchin ruangah le BAWIPA ka dawt ve hrimhrim ruangah ka vuivai bal lo.

Zeicahtiah, BAWIPA hi ka herhmi dihlak a si.

Nihin, 2021 ahcun, BAWIPA nih Martar nun a ngeimi, ram le Miphun ca i nunpek a ngamhtu mino tampi a chuahter cang hna i an chuak cuahmah ko rih lai. BAWIPA nih, 2004/2005 Hakha khua țhanghnak kha cu, “Revival fate,” a kan ti piak.

Sihmanhselaw, a kan pek laimi țhanghnak tu cu, “Țhanghnak nganpi,” a ti! Țhanghnak nganpi a kan peek tik ahcun, BAWIPA JESUH a dawmi Mino,”Martar nun” a ngeimi tampi an hung chuak te lai.

Chin ram le Chin Miphun nih luatnak kan hmuh lai i Josep le David bantuk in Thluachuah a kan pek lai. Josep le David nih BAWIPA an țih nun Thluachuah zong a kan pek chih lai.

Chin ram le Chin Miphun cu BAWIPA hngalhnak THLARAU le BAWIPA tihnak THLARAU a comi hna le Martar nun THLARAU a cotu hna le Josep nun le David nun THLARAU a comi hna nih hruai in zohkhenh ko hna seh. Lungput țhalo a ngei i position lawng a duhmi hna tu cu kan khampiak ko hna seh.

BAWIPA nih Chin ram le Chin Miphun hi a THIANG THLARAU in kan Khahter ko seh.

Martar Tluang Lian

Be the first to comment

Leave a Reply

Your email address will not be published.


*