ZEIRUANGAH CHINMI PATHIAN RIANTUANTU TAMPI KAN THIH

ZEIRUANGAH CHINMI PATHIAN RIANTUANTU TAMPI KAN THIH

Biahmaisa: Tu lio kan thih loh cu tuksum thlingza a si ko. Chinmi PATHIAN rianțuantu tamtuk kumkhat chungah an thih tikah zumtu hna kan khuaruah a har cio! “Zeiruangah dah a si hnga,”? tiin kan i hal cio hna.

BIBLE TLINNAK A SI KO

Unau cheukhat nih, PATHIAN nih Biakam hlun bantukin Biakamthar ah bia a ceih in dan a tat ti hna lo, JESUH KHRIH Tlangbawi Ngan nawlpiaktu kan ngei cang. Cucaah, nihin PATHIAN rianțuantu tampi an thih hi dantatnak a si lo. Bible nih a chimmi a tlinnak a si ko. Bible nih, raldonak, mangțaam, rai le lihnin a tlung lai a tibantukin rai a tlung i rai nihcun mizeihmanh a thlei dang lo cu ta, ti bantuk hnain hmuh ning kha chim cio a si.

RAI A TLUN HLAN IN AA THOK CANG

Miphun dang kong cu va chia rih ko u sih law, kan mah kong te hi chim ko rih u sih. Chinmi PATHIAN rianțuantu an thih hi rai a tlun hlanin aa thok cang. Ralkap nih uknak an lak khan a rak i thok cang. Ralkap nih uknak an lak hi Khuamui thuahkhatnak a si i rai a hun i bet tikah khuamui thuat hnihah a hung i cang.

Feb 1, uknak an lakthok le covid rai nih a hun kan phak hlan, khuamui thuahkhat caan lio ahkhan, kanmah Hakha Thantlang chung lawngin PATHIAN rianțuantu minung 8 nih ruahlo pipi in an kan dinh tak i kan Khuaruah a tam cang! Cu hnuah mui thuahhnihnak covid rai nih a hun kan phak tikah, PATHIAN rianțuan tu a sawmsawm in an hun thih chap tikah, kan thla a kan hlauh i, kan thin a phang i, kan ning a ți! “BAWIPA PATHIAN duhnak le tinhmi zeidah a si hnga,?” tiah, kan ruat cio.

BIAKAM THAR BIACEIH NING

Biakam hlun bantukin Biakam thar ah PATHIAN nih mi, dan a tat ti hna lo, bia a ceihti hna lo, tiah PATHIAN Vel hi a sining loin chim sual a ol ngaimi si. Biakam hlun le Biakam thar ah aa dangmi cu minung le minung karlak biaceih ning, ” ha caah ha,” tibantuk kha, “na ral va daw,” tibantuk in thlen a si. Sihmanhselaw, PATHIAN le minung kar biaceih ning kong tu ahcun, Biakam hlun bantukin nihin, Biakam thar chanah, vawleicung ah harsatnak hi a um ko i a tam hmanh a tam deuh leh lam! Ralpi pakhatnak le ralpi pahnihnak ah minung zeizat remruam dah an thi hna. Cun vawlei cung rai a tlung cangmi ah minung zeizat dah thi cang! Mangțaam a tlung cangmi ruangah minung zeizat dah a thi cang! Lihninhnak ruangah mi zeitluk tamdah an thih cang!

Bible nih, raldohnak, rai, mangțaam, lihnin a chimmi vialte hi minung sual ruang i a ummi lawngte an si dih. Bible chimmi tlinternak men i a ummi a si lo. Thlarau khamhnak kawngtu ahcun, PATHIAN Zaangfahnak a zik a phanh lio caan a si. Profet Isaiah le Daniel te hna i an chimmi PATHIAN dantatnak le harnak kong te hna hi Biakam thar ah a phan ding tampi an um.

VELNGEIHNAK CAAN I DANTATNAK

“A tu kan caan hi Velngeihnak Caan a si cang, Biakam hlun bantukin PATHIAN nih mi dan a tat ti hna lo,” tiah chim awk a țha lo.

JESUH nih Biakam thar Israel mi le tuchanmi hna cu Bia a ceih hna i, “Cucaah a sual lomi vialte hna thahnak ruang i dantatnak kha nan cungah a tlung lai; A sual lomi Abel thawk khan Biakinn le biakțheng karlak ah nan thah mi Zekhariah, Berekhiah fapa tiangkhan, hihi kan chimh hna: hi mi vialte hna ruang i dantatnak cu tuchan mi cungah hin a tlung lai,”
tiah bia a rak ceih hna ( Mt 23:35-36 ).

Biakam thar cauk chungah Israelmi tuanbia aa țial ti lo. Sihmanhselaw, History in kan hngalh khawh tawk a um ko. Biakam hlun channak in biakam thar, Velngeihnak Caan chungah Israel mi temhin caan hi a sau in a faak deuh. BAWIPA JESUH vancung i lak a si hnu AD 70 hrawng ahkhan Jerusalem cu Rom ralkap General Titas nih a tuk i Biakinn telhin Jerusalem cu an hrawh i an khangh dih cikcek.

Vawleicung khuazakip ah Juda mi cu an thek dih hna i Cu hnu cun Israel miphun hna cu 1947 lawngah ram an hung ngei kho țhan. Kum 1877 hrawng ram ngei lo in an vai!! Hitler nih Juda minung tamtuk a rak thah hna kha! Kha zat zat kha, biakam hlun ah, vokhat thihah Israel mi an thi bal lo.

TAM DEUH PEK MI CU TAM DEUH HAL VE

Luka 12:48
Tampi pekmi cu tampi hal țhan a si ve lai; tam deuh pek a simi cu tam deuh hal țhan a si ve ko lai.

Nihin cu Biakam thar, Velngeihnak Caan zikah kan um cang hna. Velngeihnak Caan a si bantukin PATHIAN nih JESUH KHRIH a zumtu paoh a THIANG THLARAU cu a kan pek dih. THIANG THLARAU hi zeitluk dah a man a fah? Vel tampi THIANG THLARAU tampi pek kan si. THLARAU laksawng tampi, Thluachuah tampi a kan pek tikah, nun tampi a kan hal țhan ve tikah, kan pe țhan ve ti lo. Hika zawn ahhin kan chambauin, kan palh in kan sual cio ko lai dah.

Pentecost Ni le kha lio hrawng PATHIAN Vel le THIANG THLARAU a rak toih hna kha rak tam tuk kaw nun tampi hal țhan an si ve. Mah thil mahta ti an rak ngei hna lo! Inn hna an zuar, lo hna an zuar, thilri hna an zuar tikah an rak i phaw cio. Sihmanhselaw Ananias le a nupi nih an lo zuarman a cheu cu an rak i thuh caah, an nu va in chikhat te ah THIANG THLARAU nih a rak thah colh ko hna kha.

Herod nih PATHIAN kha a upatnak a pek lo caah BAWIPA vancungmi nih chikhatte ah a vun tuk i pei a thih kha (Lamkaltu 12:23).

Kan nih Chin mi hna zong, Myanmar ram miphun dang vialte nak in PATHIAN Vel le a Zaangfahnak tam khun a hmu mi kan si. Cucaah tam deuh hal kan si ve ko lai. A kan hal cuahmah ko hi! Kan sualnak hi i phuang ko hna u sih.

JESUH nih, ” Ka dawtmi cu ka chimhhrin hna i dan ka tat tawn hna. Cucaah cun i biatak law na sualnak kha mer tak hna ( Bia 3:19).

KAN PALH IN KAN SUAL KO

Unau pakhat cu a zawt tikah, a thih ka siang hrimhrim lo. Cucaah a damnak hnga lungfaak ngaiin rawlulh in thla ka campiak. Dam ti lo in a thi ko. Cutikah chikhat cu ka lung a caw! “Kan thlacammi BAWIPA nih a kan leh duh țung lo ahcun, kan thi dih ko ne lai hi teh, covid rai in kan himnak hnga kan rian ngawlzauin ramlak ah i thuh maw kan herh ne lai,” ti hna ka ruat i hna bei dawng ngaiin ka um.

BAWIPA Hmai i lungdong ngai i ka um lio ahcun BAWIPA nih ka thlacamnak a ka leh lo nak a ruang cu a hun ka pemter i Ka tha a hung tlung țhan.

PATHIAN rianțuantu hna lakah mi nunnem cem Moses hmanh pei a rak i palh sual ve kha. Zu le nu le tangka ah a rak tlu lo. Thlarau lei kongah a rak i palh kha! Bia in chim ding Lungpi kha a rak tuk sual. Cucaah taksa thih biaceihnak kha a rak huah.
BAWIPA kha a rak nawl len ve ko nain, BAWIPA nih a rak ngai duh lo ( Deu 3:26).

THIHNAK LE RAM THLENNAK

1. Thlarau lei i aa palh sualmi nunnem Moses a thih hmasa locun, Joshua nih Jordan a tanpi kho hna lai lo. Aaron le kum 20 cunglei hna kha an thih hmasa lo cun, kanaan luh khawh a si lai lo.

2. PATHIAN ngaihchiattertu Sawl a thih lo ahcun, PATHIAN lawmhtertu David cu siangpahrang a țuan kho lai lo. ( A sual lo mi Jonathan zong a pa pawngte ah a thi ve khah)

3. BAWIPA rianțuan a celh ti lomi, thih duh, Elija lak a si lo ahcun thlarau let hnih Elisha nih a hmu kho lai lo.

4. JESUH a thih i lak a si lo ahcun, THIANG THLARAU a ra kho lai lo.

RALRIN RIH DING

Jeremiah 18:7-8
Zeitik caan paoh ah, miphun pakhatkhat si hna hna seh, ram pakhatkhat si hna seh, ka phawi lai, ka țheh lai, ka hrawh lai, tiah ka thlerh ko hnga, Sihmanhselaw cu ka tlerhmi miphun nih cun a țhat lonak kha a mertak ahcun a cung i thil țhalo ka tuah lai ka timi kha a țhat deuhnak in ka ruah țhan lai.

Jer 18:9-10
Cun voi khatkhat cu miphun pakhat siseh, ram pakha siseh, ka sak lai i ka phun lai, tiah bia ka ti ko hnga. Sihmanhselaw ka mithmuh ah thil țhalo kha a tuah i ka bia a ngaih lo ahcun, a ca i thil țha tuah kaa timhmi kha a ruah țhan a herh fawn ko lai.

2021 Feb, Rev. Chan Kep Tu a thih chawng ahkhan, Malaysia Pastor a țuan lio mi Unau pakhat cu lungfaak ngai in thla a rak cam. Chun i aa hngilh lio ah vancungmi pathum an rak ra i bia an rak chimh. “Tho, tho, bia kan in ruah lai an ka ti i, nangmah bantuk daitlangin PATHIAN rianțuantu a ngumi hna hi minung 1100 nunnak kan lak lai i, cu hnu cun ram a dam lai an ka ti,” tiah a ka chimh.
Jer 18:7-9 bantukin sualphuang in kan țhatlo nak mertak hna u sih.

Ka hawi nu pakhat ka hal țhan i ” Nikum ah BAWIPA nih a ka chimhmi cu hmunkipah țah ai hramnak le mitthli a luang lai,” cu hnu cun harnak pin lei thluachuah a ra lai,” a ka ti ve.

Thlacam mi nu pakhat ka hal țhan i, “Yangon hi khua vanchia a si. Thisen tampi a luang lai i Sodom khua bantukin a rawk lai, Mandalay zong thisen tampi a luang lai, teinak cu Yangon in aa thok te lai. Laitlang hi cu thisen tam a luang lai lo. Cucaah kawllei Laimi a caan um lio ah Laitlangah an kir ah a țha lai, a ka ti.

BAWIPA Vancung mi nih Israel mi cu rai in a tuk hna i thong 70,000 an thi. Jerusalem tuk a hun timh tikah, BAWIPA cu a ngaichih i BAWIPA Vancung mi cu a tlauh bantukin, PATHIAN ruanțuantu vialte le mipi vialte zong nih kan lungțhumhin kan sual phuang hna u sih. BAWIPA a ngaichih lai i tuanah a kan dam ter ko lai.

BAWIPA PATHIAN Zaangfahnak le a Vel cu a dawtmi hna cungah tlang țhan ko seh. Amen

KHRIH Sal

Tluang Lian (Martar)

===

Relchap
JESUH KHRIH MIN IN KA DOH

ASIA TIMES nih a langhtermi, thiamsang hna nih an chimmi, “Covid zawtnak thar Alpha/ Delta hi kawlram minung Million 55 chungah zat ceo nih zarhthum chungah an i chawnh kho i minung sing 100 in sing 150 tiang an thi kho,” tiah an thanhmi hi, BAWIPA JESUH KHRIH MIN in ka doh. BAWIPA Vel le Zaangfahnak cu Myanmar mipi cungah um ko seh.

NAWLNAK
BAWIPA nih a kan hruai ning aa lawh cio lo caah, Facebook khuapi hi ka chuahtak țhan zau lai. Pehtlaih a ka duhmi caah 09400303083 hi ka ph si i Viber in pehtlai khawh si lai.

Zumtu hawi le vialte BAWIPA nih a Țhawnnak in in huppheng hna seh.

Tluang Lian

Be the first to comment

Leave a Reply

Your email address will not be published.


*