Zualko : Pasaltha Minung(2) Ralkap Nih An Kan Thah Piak Than E

Ram le miphun dawtu, Ram mipi harsatnak ah thih ngamh in a cawlcang tu pasaltha (2) nih ram le miphun caah an nunnak an pek tthan e. Miphun dawtu mino hi bantuk in an kan thah piak ko hi cu lung a faktuk hringhran e.

Hi pasaltha minung pahnih hna hi, Ralkap ruang ah khua zamtak in, ralzam dirhmun ah harsa ngai in a um mi mipi hna rawl va pek ding in an kal lio ah Ralkap nih Meithal in an kah hna i an nunnak a liam hi asi.

Hi hna pahnih hi Alfred le Patrick an si. Karenni mipi, ralzam hna cu eidin tirawl an har tuk caah, Ti rawl va pek hna ding in an kal lio ah Ralap nih an tlaih hna hnu ah Meithal in an kah hna hi asi.

Hi kong he pehtlai in Karenni People Defense Force (PDF) nih ” Alfred le Patrick hi Karenni Ralzam mipi pawl Ti rawl va pek hna ding in Ralzam umnak ah an va kal. Nihin zing ah Ralzam bomh ding le tirawl pek ding in an va kal hi a si i cu ahcun Lam pi ah Ralkap nih an rak tlaih hna i an pahnih in Meithal kahnak in an thah hna hi asi” tiah an tarlangh.

Ralzam pawl an thi sual lai tiah ralzam nunnak chanh ding in a kal mi, ralzam bomh a tim mi pasaltha tiang hmanh an kan thah piak hi cu lung a fak ko.

thawngpang dang : Pu No Than Kap nih Ai Timhmi Taktak Cu A Hlawh Tling Kho Te Hnga Maw ? ( Cuanh nak )

May 21 ah kawl ralkap nih an tuahmi UEC Meeting nak ah a vai i tel vemi Pu No Than Kap cu laimi online hmangtu mi vialte nih lakawk tlaklo tianginn soisel le dohkalh a si. Mithen khat nih ‘Dalaan’ an ti i mithen khat nih Chinmi zamtaak tu tiah an ti ve i zumtu mi nih chim awk ah ai dawhlo mi bia vialte in thuat le phomh cio a si .

Zei asi poah ah Pu No Than Kap hi cu laimi kan pale chung ah cun soisel a tongbik mi le thangthatnak tampi zong a tong vemi a si i a thangthat tu nih cun an thangthat ngaingai nain a soisel tu zongn nih an soisel ning a fak bik mi a si ve fawn ko lai .A hmasa bik ah Pu No Than Kap a tuanbia kann zoh tik ah Chin miphun a dawtu pakhat cu a rak si ve ko ti a lang.

Chin miphun a dawtnak belte a boruak a tlak ning in ai thleng lengmang ve. A nolio in Chinmi dothlennak ah a rak i tel ve mi pasaltha pakhat a si i , ramchung a luh hnu ah Bible sianginn a dirh i mi sifak tampi a sianginn ah free tein a cawm hna i Bible a cawnpiak hna i degree tiang a pek hna .Ram uknak avan i thlen tik ah politics ah a lut than i party dirh in thimnak ah a lut ve than fawn.

Hi vialte a tuanbia kan zoh tik ah pa sawhsawh men nih cun an tlinh khawh lomi tuanbia a si timi cu elawk thalo a si .Tukum kawl ralkap nih uknak an lak tik ah mipi hmuhning ai dang cio i ralkap uknak a duhlo tu vialte CDM ah luh a si i biatak tein ralkap uknak an duhlo nak cu an langhter .Thisen tampi a luang cang i minung nunnak tampi a liam cang fawn.

Mipi lei zong in ralkap dohtu phu a phunphun dirhcio a si i hriamnam hmangin doh dingin timhlamhnak ngeihcio a si lio ah ralkap lei zong in hnutolh duh ti lo inn an dirnak ah fek tein an dir i zeihmanh thlachiat ruahnak an ngei kho ve tilo i boruak a sang chin lengmang cang .Khatlei ah 2020 kum i thimnak ah teinak a hmutu NLD nih cun CRDP an rak dirh ve i a cozah thar NUG an dirh ve fawn cang.

Zei a si poah ah ralkap lei nih cun rampi i hruainak ding kong ah meeting an auh i a voihnih nak UEC Meeting nak ah cun Pu No Than Kap zong a vai i tel ve taktak cang .Kawlram chung ah hin Party 93 an um i hi meeting ah hin party 59 an va kai ve tiah theih a si fawn.Hi meeting ah a vai i tel vemi Pu No Than Kap hi cu CNLD min zong in ai tel mi a si lo nain a mah chim bantuk in ‘hawi hlun pawl kut tleih pah men ah meeting a va kai mi le uico lokal bantuk sawhsawh in a vai tel ve sawhmi cu a si lo hrimhrim i , timhtuah mi thatuk cu a ngei ve hrim lai timi cu chim haulo a si ko .

Hi UEC Meeting ah hin hmailei thimnak ah NLD le meeting ah a rak chuak lomi party dang vialte telh lo ding timi ceihkhan nak zong a um len tiah theih a si tik ah CNLD zong hi sullam a ngei te lo ding bantuk dirhmun ah a hung cang .Khatlei ah Pu No Than Kap hi politics thinker a si i mipi nih rak hmuh khawh lomi tampi a rak hmu khotu pakhat a si ve . Amah nih hin ralkap uknak hi thazang peknak si lemlo in dohkhawh nak lam tu a rak i timh mi a si kho .

Sandah va piah i mipi hmai bia va chim le online in aukhuan sawhsawh men le tlaih tih ah mizoramm lei ah zam cu ai tim bak lo ti a si .Ralkap nih hin mipi nih kan duh ah maw duhlo ah maw , mipi ruahnak pakhat hmanh la lo in thimnak tuah cu a timh thiamthiam ko lai caah , anmah lei tang bantuk in langh i an chungmuril vialte theih dih hnu ah anmah cihmit ding le teinak hmu te ding in ntimhlamh nak a rak ngeihca zong a si kho tiah a cuanmi an tampi fawn.

2010 kum lio ah khan election luhding in mi a sawm len hna nain a hohmanh nih election lamtling a um lai an rak zum kho cio lo i NLD pi hmanh nih an rak zum duh lo timi kong zong a chim bal cang.1990 lio bantuk in nawl ngeihnak peklo lai an rak phang .Asinain 2010 ah election a hung um taktak i Sagaing CAM ah thim a rak si .NLD zong 2012 ah By-election ah an rak luhthan kha a rak si .Zei a si zong ah tutan zong ah hin Pu No Than Kap nih hin kawl ralkap nih election an tuah khawh a zumh i cu election caah cun timhlamhnak ngeihcia a duh ve ruang ah a si lai tiah ruahpiak khawh a si .

Rampi ruahnak cheutu Aung San Suu Kyi le U Win Myint cu nawlbuarnak phun 5 in tazacuai a si i , an pahnih in ralkap nih an chuah than te hna lai timi zong Pu No nih hin a ruahchan kho ti hrim lo ti zong a fiang fawn i a dam chung can tawite chung le a nunnak nitlak lei a panh cangmi a caah a duhmi lam zulh hi a sual tuk tilo tiah ai ruah cang ti zong a fiang fawn.Asinain ai timhlamh bantuk in niceu a chuak kho taktak te lai ma wtimi belte cu caan lawng nih bia a chim khawh te lai .

Note : Hi bia hi keimah ruahnak in ka tialmi asi lo i ka hmuhning pakhat hmanh ai tel lo. Cun Pu No Than Kap tialmi zong a si fawnlo . Pu No Than Kap a tuanbia a zohtik ah a hmuhning kha Falam upa pakhat (min langhter lomi) nih a tialmi kan rak leh than mi a si .

Be the first to comment

Leave a Reply

Your email address will not be published.


*