အမျိုးသမီးအခွင့်အရေးနှင့် ပတ်သက်၍ တာလီဘန်များ၏ ခံယူချက်မပြောင်းလဲ

အမျိုးသမီးအခွင့်အရေးနှင့် ပတ်သက်၍ တာလီဘန်များ၏ ခံယူချက်မပြောင်းလဲ

 

တာလီဘန်များ၏ သတင်းစာရှင်းလင်းပွဲအပြီးတွင် တာလီဘန်များ၏ အတွေးအခေါ်သည် ပြောင်းလဲသွားပြီး အမျိုးသမီးများအတွက် အလုပ်လုပ်ပိုင်ခွင့်များပေးလိမ့်မည်ဟု သတင်းများထွက်ပေါ်လာခဲ့သော်လည်း ရှာရီယာဥပဒေကိုမလိုက်နာသည့်အတွက် အာဖဂန်နစ္စတန်ကအမျိုးသမီးများကို ရက်စက်သည့် ပြစ်ဒဏ်များပေးသည့်အတွက် တာလီဘန်များ၏ အတွေးအခေါ်သည်မပြောင်းလဲကြောင်း နိုင်ငံရေးနှင့် နိုင်ငံခြားရေးရာဌာန (CPFA) ၏ ဥက္ကဌ ဖေဘီယန် ဘူဆာရတ်က ပြောကြားခဲ့သည်။

 

အာဖဂန်နစ္စတန်သည် တာလီဘန်တို့ ချမှတ်ခဲ့သော အကြမ်းတမ်းဆုံးနှင့် အဆိုးရွားဆုံးလူသားချင်း စာနာထောက်ထားမှုဆိုင်ရာ အကျပ်အတည်းများကို မျက်မြင်ကြုံတွေ့ နေရပြီး ငြိမ်းချမ်းရေးနှင့် ပတ်သက်လျှင် တာလီဘန်များ၏ စကားများကို အလေးအနက်ထားပါက နိုင်ငံတကာအသိုင်းအဝန်းအနေဖြင့် နုံအလွန်းရာ ကျမည်ဟု Times of Israel သတင်း၏ အတွေးအမြင်ကဏ္ဍတွင် ဘူဆာရတ်က ရေးသားခဲ့သည်။

 

ကဘူးလ်မြို့တာလီဘန်များလက်အောက်သို့ ကျရောက်ချိန်မှစ၍ တာလီဘန်ဦးဆောင်သော အာဖဂန်နစ္စတန် လက်အောက်ရှိ အမျိုးသမီးများလုံခြုံရေးအတွက် စိုးရိမ်မှုများမြင့်တက်လာနေကြောင်း လူ့အခွင့်အရေး ကျွမ်းကျင်သူ အများအပြားက ပြောကြားခဲ့သည်ဟု ကဘူးလ်မြို့ရှိ အကြံပေးအဖွဲ့ အာဖဂန် သုတေသနနှင့် အကဲဖြတ်အဖွဲ့၏ လက်ထောက်ညွှန်ကြားရေးမှူး မော့ဝါနီက ပြောကြားခဲ့သည်။

 

အမျိုးသမီးတွေ ကျောင်းမတက်ရတဲ့ ၁၉၉၀ ပြည့်နှစ်တွေက အာဖဂန်နစ္စတန်မှာ တာလီဘန်တွေ အာဏာရခဲ့ချိန်ကလိုပါပဲ”

 

“အုပ်ထိန်းသူ ယောကျာ်းလေးအဖော်မပါဘဲ ဆေးဝါးဝယ်ဖို့ သူတို့အပြင်မထွက်နိုင်ပါဘူး။ စောင့်ကြည့်နေကြပါတယ်။ ဒါက ကြောက်ရွံ့နေရတဲ့ အခြေအနေပါ ”

 

တာလီဘန်များ နိုင်ငံအာဏာရရှိလာခြင်းကြောင့် အာဖဂန်အမျိုးသမီးများသည် သူတို့၏ အသက်အန္တရယ် အလွန်အမင်း ခြိမ်းခြောက်ခံနေရသည်ဟု ခံစားနေရကြောင်း သူက မှတ်ချက်ပြုခဲ့သည်။

 

ကဘူးလ်ရဲဌာနတွင် ရာဇဝတ်မှုစုံစမ်းစစ်ဆေးရေးအရာရှိအဖြစ်အလုပ်လုပ်နေသော အသက် ၂၂ နှစ်အရွယ် ဆာဟယ်က လူမှုမီဒီယာများတွင် ခြိမ်းခြောက်စာများ ပုံမှန်ရရှိနေသည့်အပြင် တာလီဘန်များသည် သူမအလုပ်လုပ်သောရုံးသို့ စာပို့ပြီး သတ်ဖြတ်မည်ဟု စတင်ခြိမ်းခြောက်လာနေကြောင်းပြောကြားခဲ့သည်။

 

“ တာလီဘန်တွေ အာဏာပြန်ရရင် အစိုးရစစ်တပ်နဲ့ လုံခြုံရေးတပ်ဖွဲ့ဝင် အဖြစ် အလုပ်လုပ်နေတဲ့ အခြားအမျိုး သမီးတွေနဲ့ အတူ လူအုပ်ရှေ့မှာ ကျောက်ခဲနဲ့ ပေါက်သတ်ခံရင်ခံရ ဒါမှမဟုတ် ကွပ်မျက်ခံရပါ လိမ့်မယ်။ ” ဟု သူမက ဆိုခဲ့သည်။

 

“ အမျိုးသမီးတစ်ယောက်ရဲ့ လွတ်လပ်စွာသွားလာခွင့်ကို ဆုံးရှုံးလိုက်ရတာနဲ့ ရှင်က သူ့မိသားစုအတွက် အသုံးချနိုင်စွမ်းကို ကန့်သတ်လိုက်တာပါပဲ” ဟု လူ့အခွင့်အရေးဆိုင်ရာ မဟာမင်းကြီးရုံး (OHCHR) ၏ ပြောရေးဆိုခွင့်ရှိသူ ရှမ်ဒါဆာနီ ကသတင်းစာ ရှင်းလင်းပွဲ တစ်ခုတွင် ဆိုခဲ့သည်။

 

 

Translate – Mizzima

Be the first to comment

Leave a Reply

Your email address will not be published.


*