Biden Ruangah American Cu An Hawi Le Nih Zumhtlaak Lo Ram Ah An Chia Sual Lai Maw?

Biden Ruangah American Cu An Hawi Le Nih Zumhtlaak Lo Ram Ah An Chia Sual Lai Maw?

American President Joe Biden cozah nih Afghanistan ram in American pawl hnawhnam ngai in chuah ter ding in biachahnak an tuahmi kong he pehtlai in soisel tu hna nih president Biden cungah sual an phawt bantuk in Afghanistan ram ah rianttuan tu American miphun hna le an mah Afghan mipi hna zong nih a herh lomi thil si, zumhtlaak lo a sinak a langhter tiah an hmuh ning an langhter hna.

Afghanistan ram khualipi Kabul khua airport ah zoh a nuam lo ngaimi hmanthlaak le video a hung chuah tik ah a cungah kan langhtermi hmuhnak le soiselnak cu a hung zualhma chin, nitlaak lei rammi hna nih Afghanistan ram ah thisen, thlan, caan le phaisa tampi investment an tuah bantuk in Afghan mipi hna zong nih an tuah ve.

Biden cozah nih Afghanistan in US ralkap pawl a kir ter hnami cungah soiselnak a chuakmi hi sualphawth awk a ttha lo, a ruangah cu US ralkap pawl an chuah tlawmpaal ah Afghanistan ram cu Taliban hna kut cungah phan in le remh khawh lo ding tiang in a rawk cang, Afghanistan hi a luan ciami nihnih chungah an sungh si loin a luan ciami kum 20 chungah khan duhsah duhsah tein a rak sung cang maw timi bia halnak zong a chuak.

Afghanistan ram in American ni an ralkap pawl a kir ter hna ruangah American cungah zumhnak le ruahchannak a neitu ram hna nih an hmuh ning, vawlei buainak ah American nih a rak dirpi tawn ning hna le thil dang dang cungah tampi hnorsuannak a um, president a tlin hna ah thil a cangmi le president a tlin hlaan ah American a kir tthan cang tiah a rak chimmi bia kha a tak in a si kho te hnga maw?

News Paper chuah tu hna nih American rammi pawl Helicopter in an kalpi hnanak hmantlaak pawl cu an news paper cahmai bak ah an langhter i Vietnam ral doh lio ah a rak cangmi thil he an vun tahchunh cang, South Vietnam cu American ralkap pawl nih an chuahtaak hnu kum 2 hrawng lawng ah a tlu, a si nain Afghanistan tu cu zarhkhat hmanh a nguh rua lo, US nih cun Afghanistan ralkap pawl nih hin caan zei maw zat chung cu Taliban pawl an doh khawh ko hna lai tiah a rak ruah sual rua!

A si nain Afghanistan cu Vietnam he aa rak khat hrim lo, Afghanistan ram chung i Taliban pawl he dohnak i Vietnam ram ral dohnak he aa rak khat hrim lo, a bik in tuni kan chan hi a luan ciami kum 1970 lio he cun tahchunh awk a rak ttha hrim hrim lo, aa dang tuk cang, American le nitlaak lei ram cheukhat hna nih hin vawlei cung buainak kong an i telnak ah hin hlawhtlinnak zei maw zat an hmuh ko nain Afghanistan ram a pur nak ah hin cun an sung bak ko.

Tu lio ah aa nuam ngai dingmi le a ni thluahmah dingmi cu Moscow (Russia) le Bejing (Tuluk) an si, Democracy le upadi ning tein uknak chuahternak ding in aa zuam ngaimi American le nichuah lei ram hna nih an cawlcanghnak ah hin Afghanistan ah cun an sung bak ko, Biden nih US president rian a ttuan chung paoh cu mah bantuk hi a chuak lengmang ko lai.

Afghanistan purnak kongah a biapi tak tak mi thil pakhat cu American cungah a hawi le ram hna nih zei tin dah an hmuh lai, Afghanistan purnak nih hin American le a hawikawm ram hna kar ah zei bantuk thil dah a chuah ter lai, tu ah an tonmi thil a hung dih tik ah hin NATO chungtel ram hna lawng si loin Israel, Taiwam, South Korea le Japan hna tiang nih American cungah zumh ngamnak an nei ngam lai maw?

Hi thil vialte a chuahnak a hram pi cu santlaihnak nei lo pa Biden ruangah si, Afghanistan ram purnak ah hin ttuanvo nei tu bik ka si ti aa theih ah cun a mah tein chuahnak ca zong a chiah awk si, zei ruangah tiah Afghanistan ram in American ralkap pawl kir ter ding in biachahnak tuah tu cu a mah Biden bak hi si.

The Chin Post

Be the first to comment

Leave a Reply

Your email address will not be published.


*