China le ASEAN Palai Kawlram Kong Ah An I Chawn

China le ASEAN Palai Kawlram Kong Ah An I Chawn

China le ASEAN Palai Kawlram Kong Ah An I Chawn China ramdang lei vuanci Wang Yi le ASEAN Kawlram palai Brunai ramdang vuanci- 2 Erywan Yusof hna cu Kawlram kong he pehtlaihin nizaan August 18 ah khan phone in an i chawn.

Atu lio Kawlram chung thil a cang lio mi kongah ASEAN palai nih a ruahnak a chim hnuah China ramdang vuanci Wang Yi nih ASEAN le China cu Kawlram hawikom kan si i, Kawlram chungah remdaihnak a um kho lai tiin ka zumh.

Kawlram kongah buainak he pehtlaihnak a ngei mi vialte he i tong in, phunghrampi chungin a phi kawl ding le Mr. Erywan Yusof nih ASEAN hnatlaknak 5 ningin tha tein rian a tuan khawh lai ti ka zumh.

Kawlram buainak he a pehtlaihmi vialte hna nih zumhnak an ngeih khawhnak dingah duhsa tein tawlrel ding, Covid-19 dohnak kong ah Kawlram bawmhchanh ding, remdaihnak caah lungsau tein tuah ding le mipi sin ah nawlngeihnak tha tein pek than i, democracy lam ah a kal khawhnak dingah tawlrel dingin Wang Yi nih a chim.

China ramdang lei vuanci Wang Yi nih Kawlram kong he pehtlaih in China nihcun a thatnak leiin tawlrel piak dingin ruahnak kan ngei tiah a chim.

SEAN special anvoy to Myanmar Mr. Erywan Yusof nih keimah cu ASEAN palai ka si bantukin ASEAN hnatlaknak ningin a kalpi ding ka si banutkin Kawlram he pehtlaihin Taluk dirhmun cu ka pom i, kan tuanti nak zong fek chinchin dingin ka duh tiah a chim.
Ref; MFA
==

Thawngdang
Himnak Pek Khawh Ahcun CDM Tuah A Duhmi Ralkap 500 Hrawng An Um

Himnak Pek Khawh Ahcun CDM Tuah A Duhmi Ralkap 500 Hrawng An Um Interim National Union Government (INUG) nih himnak a kan pek khawh ahcun thla 1 chungah CDM luh a duh mi ralkap 500 hrawng min cazin kan ngei tiah mipi ralkap (people soldier) phu nih an thanh.

Mipi ralkhap phu hi CDM a tuah mi ralbawi le ralkap hna nih CDM a tuah duh mi hna le INUG kar ah pehtlaihnak a tuah piak tu le a bawmtu phu an si.

Ralkap 500 cu battalion 5 tluk an si i, mipi le mipi ralkap fonh mi nih mipi dohthlennak caah teinak lam pakhat a si tiah mipi ralkap phu nih a langhter.

Nizaan ah Tayeh peng ralhrangbu meithal sernak zungin ralkap 10 leng le nihin ah Dawei pengah a um mi khah-lah-yah (25) in ralkap 25 nih hriamnam he an zaam tiah theih a si.

Ralhrangbu nih uknak a lak hnuah CDM ah a lut mi ralkap 1500 hrawng an si cang tiah CDM a tuah mi hna a bawm tu CDM Capt. Lin Htet Aung nih Myanmar Now ah a chim.

Atulio ah covid zawtnak ruangah lengchuah khawh a si rih lo caah CDM a lut duh mi ralbawi le ralkap hna nih mipi thinlung put he pehtlaihin INUG defence ministry nih a cohlan mi Pre-CDM code lak khawh a si.

Pre-CDM code a la duh mi, ralhrangbu chungah a um lio mi hna cu mipi ralkap phu pehtlaih khawhnak @Myanmar People Telegram http;//t.me/MyanmarPeople ah pehtlaihnak tuah code lak khawh a si tiin ပြည်သူ့ရင်ခွင်အဖွဲ့ nih an langhter tiah RiSE News nih a tial.
Ref; Rise News
===

Thawngdang
Ralhrangbu Nih Gangaw Peng Hninkha Khua An Luhhnawh,Kum 72 Mi Pakhat An Velh

Gangaw peng Kalay le Gangaw lam kam ah a um mi Hninkha khua cu ralhrangbu nih tuzing ah an luhhnawh i inn an bauh, innchung thilri hna an lak piak hna hlei ah kum 72 tarpa pakhat cu an velh.

Ralhrangbu nih Hninkha khua an luh ah khuami tam deuh cu an zaam.A tli zaam kho lo mi tarnu tarpa hna ti lo ah khuami vialte cu an zaam dih tiah theih a si.

Tarpa pakhat a zaam khawh lo ruangah innchungah a um mi cu an velh,Kan khua an lut, kan inn an kan hrawh piak, kan thil an kan lak piak mi hi voikhat lawng a si ti lo tiah Hninkha khuami pakhat nih a chim.

Ralhrangbu nih hi tin an tuah mi hi August 18 ah Kalay – Gangaw lam ah PDF nih an mawtaw bomb in an puahnak ah mirawitu pawl nih Hninkha khuami nih thawng an thanh tiah an chimh hna ruangah a si tiah theih a si.

Ralhrangbu nih Hninkha khua an luhhnawh ruangah Hninkha le a pawngkam khua hna cu hmunhimnak lei ah an zam tiah theih a si.
# Irrawaddy
==

Thawngdang
US Ralkap Afghanistan Ah Timh Ningnak Sau An Um Rih Men Lai

US Ralkap Afghanistan Ah Timh Ningnak Sau An Um Rih Men Lai US president Joe Biden nih US ralkap hna cu Afghanistan ah an i timhcia mi nakin sau deuh an um rih men lai tiah a chim.

US nih Afghanistan i an ralkap hna cu tu thla dih ah lak dih dingin a timh mi a si nain, atu hi Afghanistan ah US mi 15,000 hrawng an taang rih tiah theih a si.

Khatalei ah nitlak lei ram hna nih anmah he rian a tuanti mi le an rian a tuan piak lio mi Afghan mi hna cu an ram in lak dingin timhtuah cio a si i, US zong nih an ralkap holh lettu le an rian a bawmtu hna 65,000 hrawng chanh ding a ngei i, atu tiangah minung 52,000 cu a lak cang hna.

Taliban zong nih Afghanistan in chuah a tim mi hna cu Kabul airport an phak khawh lo nak dingah meithal he a kham hna.Airport ah document a ngei mi lawng nan lut kho lai tiin an kham hna.A taktak ti ahcun document a ngeimi hna zong an luhter duh hna lo tiah an chim.

Atu hi Kabul khuapi Karzai international airport cu US ralkap 4,500 nih umhmun an khuar i, Taliban pawl zong nih a pawngkam ah an congh ve hna.

Kan hnu zarhpi ni thawkin Kabul airport le a pawngkam ah minung 12 cu meithal in an kah hna ruang le mipi an buainak ah an nunnak a liam.

US ram mi cheukhat hna zong Afghanistan ram in an i timhcia bantukin an chuak kho rih lo caah US domestic airline hna cu US defence secretary nawlpek nak he an minung hna an chanh khawh cang hna lai tiah theih a si.

Afghanistan in a zaam mi hna cu vawleicung ramkip ah an phan cang. Mah hna lakah tam deuh cu Kabul i ramleng cozah he a pehtlaihmi riantuantu hna an si i, cheukhat cu an chungkhar he a pem mi an si.
Ref; bbc

The Chin Post

Be the first to comment

Leave a Reply

Your email address will not be published.


*