Hriamtlai Phu pakhat nih Assam ah Mawtaw 7 an khangh lengah minung 5 an thah hna

Hriamtlai phu pakhat nh Assam ah Mawtaw 7 an khangh lengah minung 5 an thah hna

 

India, Assam state Dima Hasao district, Umrangso ah hriamtlai phu pakhat nih thil phor mi mawtaw (truck) 7 mei in an khangh pin ah minung 5 cu meithal in an kahthat hna.

 

Palek nih an hlathlainak ah hriamtlai phu hna hi August 26 zan suimilam 8:30 in 9 kar ah automatic rifle he mawtaw hi an kah ruangah mawtaw khaltu le a zultu hna an thi.Mawtaw an khangh mi hi mirang vawlei le lungmeihol a phor mi a si.

 

Dimasa National Liberation Front (DNLA) hna nih an tuah mi a si lai. Truck an khanghnak ruang hi mirang vawlei an ser nak factory hna nih ngunkhuai an pek duh lo ruangah a si kho men tiah Dima Hasao police SP Jayant Singh nih a chim.

 

Kan May 14 ah khan DNLA hriamtlai phu nih Assam, Digboi ah grenade an puah ruangah minung pahnih an nunnak a liam. January 27 ah khan DNLA pawl nih social activist le Dilma Halam Daogah hruaitu Amit Nunisa cu an thah.

 

DNLA hi 2019 April thla ah dirh mi a si i, Dimasa miphun hna cu a dang tein um an duh ruangah dirh mi a si. 2020 kum dongh leiin biatak tein cawlcangh hram a thawk mi an si.

 

March 28 ah an hruaitu Black Dimasa an ti mi India ralkap he i kahnak ah a nunnak a liam i, May 23 ah Karbi Anglong district ah DNLA chungtel 6 kah an si.

 

Thawngpang hlathlaitu hna nih an chimnak ah DNLA hna hi Isak Muivah hruaimi National Socialist Council of Nagaland (NSCN-M) nih an bawmh tiah an chim.

 

Ref; the aizawl post

The Chin Post

Be the first to comment

Leave a Reply

Your email address will not be published.


*