ICRC Nih Kinma Khua Bawmhnak Pek Ding A Thulh

ICRC Nih Kinma Khua Bawmhnak Pek Ding A Thulh

 

June 15 ah ralhrang nih a khua ningin mei in an khangh mi Magwe ramthen Pauk peng Kinma khua cu International Committee of Red Cross nih bawmhnak pek a timh nain Covid ruangah an thulh than tiah theih a si.

 

Kinma khuami hna hi an inn le lo mei nih a kangh dih hlei ah ngandamnak lei zohkhenhnak zong harsatnak tampi an tong tiah theih a si.

 

Kinma khua bawmhnak hi nizan August 26 ah bawmhnak pek dingin ICRC he ceih dih cang mi a si nain covid ruangah mah timhtuahnak hi ICRC nih a thulh than.Khuami hna cu inn le lo pin ah eidin zong bawmh kan herh ngai tiah khuami pakhat nih a chim.

 

Hi kong he pehtlaih in VOA nih ICRC cu zungah cakuat in thil si ning an hal nain, zeihmanh caa an kan let rih lo tiah VOA nih a tial.

 

Kinma khua a kangh nak hi thla 2 leng a si cang nain, a tutiang ramdang bawmhnak pakhat hmanh an hmuh rih lo.Atu tiang ram tangah an i dor rih, khuami hna an khua ah an um than khawhnak ding zong harsatnak tampi an ngei.

 

Pauk thlanglei ah a um mi Kinma le pawngkam khua in khuapi ah ngandamnak lei zoh ter dingin a kal mi hna cu ralhrang hna nih a ruang umlo in an tlaih lengmang hna ruangah ngandamnak lei ah harsatnak tampi an tong.

 

Sii inn ah i zoh ter dingin a kal mi ralhrang nih an tlaih mi 10 leng an si cang. A bik in Pathein – Mungyua lam ah an tlaih mi hna a si. Cheukhat cu chihkhat caah tuahmi gate ah an tlaih hna. An tlaih mi chungah Kinma khua i volunteer siibawi pa le a bawmtu pa zong an tel tiah khuami nih an chim.

 

August 24 ah khan Pauk thlanglei khua pakhat in khuachungah sii zohter dingin a kal mi nupa lakah an pa cu ralhrang nih an tlaih i, atu tiang a chungle he an i pehtlaih kho rih lo tiah khuami nih an chim.Pauk thlanglei Kinma khua hrawng hi ralhrangbu le PDF hna an i kah lengmang nak hmun a si.

 

Ref; VOA

The Chin Post

Be the first to comment

Leave a Reply

Your email address will not be published.


*