JESUH CU BIAK AWK AH AI TLAK By F. Bawi Khamh

JESUH CU BIAK AWK AH AA TLAK.

Deut 32: 18 zoh tikah, An hringtu lungpi, an sortu Pathian timi a um. Hringtu sortu ti sullam cu sertu tinak a si. Lungpi timi cu himnak dornak a fekmi tinak a si ko. Moses nih Pathian cu, cu bantuk cu a si e a ti. David zong nih ka himnak Lungpi a ti zungzal mi a sl. Moses le Israel mi, sin i a rak kal lengmang mi thlarau lungpi chungin Ti cu an din a ti. Cu Lungpi cu Kri kha a si tiah Paul nih a chim. 1 Kor 10:4

Hebru 11: 26 Moses nih, Messiah ruang i nihsawhnak in cu Izipt ram chawhlawn vialte nakin a sung deuh ah a rel a ti. B. C ah a sinain A.D ah ṭial a si.

A.D ah, “Messiah nih vawlei a lamh lio ah Moses cu vawlei ah a um ti fawn lo, cucu zeitindah Moses nih, “Messiah ruangah sifah in aa thim khawh? tiah cun, Moses a rak autu, Moses a umpitu Pathian kha, “Messiah a si tiah a langhter.

Moses Cauk ah, An hringtu lungpi an sortu Pathian a ti caah le, “Moses le Israel mi sin i a rak kal lengmang mi thlarau lungpi kha, Kri a si a ti caah, Kri cu kan Pa a si. Amah cu minung vunhawng le taksa bantuk i aa thuam i rawlṭam Tihal a hmang, lungretheih le ngaihchiat a hmang i thla zong a cam ve ko. Pathian a si ko ahcun ho sin ah dah thla cu a cam ne? nan ti men hnga, Minung nih kan tuah hnga dingmi a kan hmuhsak mi a si. A thih i a thawh hnu ah thla a cam timi khoika Bible caang hmanh a um ti lo. Vawlei cungah Minung bantuk lawng a si, Mari kha DNA check hna sehlaw Jesuh hi a fapa a si ko timi a langhter kho lai lo.

PATHIAN A SINAK AU AW.
Cucaah pei, “Bawipa Pathian a ra lio e ti a si ko. Isaiah 2:1.

Mah vialte hi sinak a ngeihmi a si.
Isaiah 9:6.
Amah cu Fapa,
Amah cu Uktu Bawi,
Amah cu Fimchimtu,
Amah cu A ṭhawngmi,
Amah cu Pathian,
Amah cu Zungzal Hmun Pa Le
Amah cu Daihnak Bawi a si a ti. Mahka zawn-ah, Fapa, uktu Bawi, Fimchimtu tile Daihnak Bawi a siti cu fak ngai-in na aupi ve tung nain, Pathian a sinak bel cu hloh na timh i kan Pa le Kan Pathian a si lo e na ti lengmang faktuk in na palh.

Maw Zion fakpiin au law thawngṭha kha thanh tuah. Au ko ṭih hlah a ti. Pathian a si, ti chim hi ṭih a rak nung bakmi a si caah, Ṭih hlah a tinak a si. Tuchanmi zong nih Pathian a si ti chim hi an ṭih an ngamh lo an duh lo. Judah ram khua hna kha nan Pathian cu a ra lio tiah chim hna timi Isaiah 40:9.10 ah na hmu ko nain, zeicadah na chim ngam lo? zeicadah na chim duh lo?. A chimmi hmanh na doh hna tikah palh fak in na palh.

Naa thawh i, Nambar 23:19 i Pathian nih cun zeitindah lih cu a chim khawh lai, minung a si tung lo! Zeitindah aa ngaichih khawh lai minung fapa a si ṭung lo, timi bia hin, “Jesuh cu minung a si, Pathian a si lo ti, va sawh ternak caah na hman. Bible bia hi mu! a zawn lo na chiah ahcun nangmah le nangmah naa hliam ko lai dakaw.

Paul nih lungpi cu Kri a si a ti kan ti cang, “Moses nih hringtu lungpi sortu Pathian a si, a ti kan ti cang. Cucaah Phungth 8:1 in 36 tiang hi a dihlak in, “Jesuh kong a si dih, relnak 32 nak zawn ahcun, Atu cu ka fapa le hna ka bia hi ngai u timi a um. Ka fapa le hna a kan ti ahcun, amah cu kan Pathian le kan Pa a si hnga lo maw?.

Isaiah nih Fapa cu Pathian a si a ti. Zekhariah nih Bawipa ka Pathian cu a mithiang vialte hna he an lang lai a ti, Mithiang hna he a lang ding cu Jesuh dah ti lo hodah a um ti?.

Piter nih Pathian Messiah na si a ti ko. Thomas nih ka Bawipa le ka Pathian a ti ko. Amah Jesuh hrimhrim zong nih, Johan cu tipil pek a fial i, Johan nih a ngamh lo tikah, “Jesuh hirimhrim nih pei Pathian a sinak cu aa phuan kha? Zei a ti? “Pathian nih tuah, a timi cu tuah ko a ti kha? Mah hi vialte a um ko nain zeicadah lang lo dingin na khuh?

Jesuh hi minung bantuk sinak i hrawm in hrin a sinak ah hin kan unau a si, minung sinah a um caah kan hawi zong a si taktak ko nain a thi cu minung thi he aa khat lo.

Vanmi nih cun biak a duh lo
Johan nih vancungmi ke hram ah bawk in biak a timh. Vancungmi nih cun, “Bawk hla. Keimah zong nangmah bantuk in Pathian sal ka si ve ko, Pathian tu bia tuah a ti. Zeicatiah Vanmi cu biak tlaak mi an si lo caah a si.

JESUH CU BIAK AWK AH AA TLAK.
Jesuh hi an bia kun maw?
A chuah kate ah Mifim nih an biak ko.Matthai 2:11.
Mitcaw pa nih a biak ko. Johan 9:39
Mari Magdalin le Mari dang nih an biak ko. Matthai 28:9

Vancung a kai laite zong ah, Zultu dihlak nih an biak ko. Luka 24:52.
Hihi Exodus 23:25 i Bawipa nan Pathian lawnglawng nan biak lai timi a tlinnak hnga caah a si. Amen!

VANCUNG ZONGAH AN BIAK
Biathiam 1: 18. Keicu a nungmi kha ka si. Ka rak thi, sihmanhsehlaw zohmanh, zungzal in zungzal tiang ka nun cang a ti.

Biat 4:10 Upa kul le pali kha, Bawi
ṭhutdan cung i aummi hmai ahcun an kun i zungzal in zungzal tiang a nungmi cu an biak. 11 kan Bawipa le kan Pathian, Nangmah cu sunparnak le upatnak le lianghngannak kha hmuh awkah aa tlaakmi na si an ti. Amen!

F. Bawi Khamh

Be the first to comment

Leave a Reply

Your email address will not be published.


*