Jesuh hi Pathian a si maw?

Jesuh hi Pathian a si maw?

Biahmaithi :- Dawtmi u le nau hna hihi Jesuh vawlei a rat hlan le thihnakin Pa sunparnak in thawhter a si hnu kong kha si loin Jesuh vawlei a um lio kong kha mah doctrines lawng a tanhmi pawl nih kan hngalh awkah a biapi bakmi a si caah Pathian thawngin ka van langhternak zong a si. Theithiamnak he Jesuh Khrih min in rak rel ve law..

✍️ Khrih ah dawtmi u le nau hna Jesuh hi Pathian a si maw?” timi bia hi van i ruah than rih ko hna u sih ti ka duh. Zeicatiah Jesuh nih, “Pa sinin ka run thlah laimi Fimchimtu, Pa sinin a rami, biatak Thlarau a rat tikah cun ka sining kha a langhter lai,” tiah a kan ti. ( Johan 15 : 26 ). Cucaah Jesuh kong hi Thiang Thlarau ngeih ve tung lo ahcun ahohmanh zong nih hngalh khawh a si loh. Cu pinah Pa a hngal lomi nih Jesuh hngalh khawh a si hrimhirm fawn loh. ( Luka 10 : 22 {b} ). Cucaah cun Jesuh hi Pathian a si kan ti lawng hmanh si lo Jesuh lawnglawng hi Pathian a si tiah kan ti chap. A palh cikcekmi le Bible zongah a um lomi mah nih ruahnak menmen in chawnpiaknak pakhat a si. Zeicatiah Peter nih Jesuh hi A Nungmi Pathian Fapa Khrih a si ti a hngalh khawhmi hi Pa thawngin a si. Cucaah cun Jesuh hrimhrim zong nih, “Johan fapa Simon, mi vanṭha ngaingai na si! Zeicahtiah hi biatak cu minung sinin na hngalhmi a si lo i vancung i a ummi ka Pa nih an pekmi a si,” tiah a ti. ( Mathai 16 : 17 ). Hi Jesuh bia na hmuh ko nain Jesuh lawnglawng Pathian a si na ti khawhmi hi cu mi mak taktak na rak si. Na chungah biatak pakhat hmanh a um loh..

✍️ Dawtmi u le nau hna Jesuh kongah hin Thiang Thlarua nih a langtermi cu hitin hin a si. Jesuh cu Adam sualin hrimmi nungak vergin Mary nih a hrinmi a si. ( Mathai 1 : 16 ). Cu a hring ning kong zongah hin vancungmi nih cun, “Thiang Thlarau kha na cungah a phan lai i Pathian ṭhawnnak cu na cungah aa fu lai. Hi ruangah hin a thiangmi fa cu Pathian Fapa tiah ti a si lai,” tiah an ti. ( Luka 1 : 35 ). Cucaah cun Jesuh cu Pathian Fapa hrimhrim a si. ( Johan 10 : 36 ). Cu pinah kan hngalh awkah ka duhmi cu Jesuh timi min hi Pathian sinak min in pekmi a rak si hrimhrim loh i taksa minung min sinak catu dingah khan pekmi min a si ti zong kha Bible nih cun a kan cawnpiakmi cu a rak si. ( Mathai 1 : 21 ), ( Luka 1 : 30 – 31 ), ( 2Samuel 7 : 14 ). Hika zawnah hin vancungmi hna nih an sakmi a si ko caah Pathian sinak min in pekmi a si ve ko ee tiah na ti sual hawi nakhnga lo ding caah Pathian kan Pa bak nih hin Abraham fapa a simi Isak zong hi min a sakmi a si ko nain Pathian a si ve hlei loh. ( Genesis 17 : 19 ). Taksa minung sinak min tu kha a rak si. Cu bantukin cun Jesuh timi min zong hi Pathian sinak min a si lo i taksa minung sinak min tu kha a rak si. ( Mathai 1 : 25 )..

✍️ Zeicatiah Thiang Thlarau nih a umpi zungzalmi lamkaltu Paul nih cun, “A hram thawk tein Pathian sining a ngei ko nain Pathian he i tluk cu i cuh dingah a ruat bal lo; a sining vialte kaltak in mithi ah aa cang i minung ah hrin a si,” tiah a ti. ( Filipi 2 : 6 – 7 ). Hika zawn teah hin lamkaltu Paul nih, “A sining vialte kaltak in mithi ah aa cang,” tiah a timi nih hin a langtermi pakhat a um i cucu lamkaltu Paul thiamthiam nih cun, “Nan thi cang i nan nunnak cu Khrih he Pathian sinah aa thup,” tiah a timi hi a rak si. ( Kolose 3 : 3 ). Cu bantukin nunnak taktak a simi Khrih Thlarau cu Pathian sinah aa thup tiah a hmanmi ah hin Jesuh cu Pathian bia vialte tlintertu a sinak in Cathiang nih, “Israel Pathian, a mi a khamhtu hna Pathian hi, amah le amah aa thupmi Pathian a si,’ tiah an chim lai,” a timi tlinak kha a si. ( Isaiah 45 : 15 ). Cun na hngalh awkah ka duh thanmi cu nunnak taktak a simi Khrih Thlarau cu Pathian sinah aa thup ka ti tikah khin Khrih cu taksa pum in a rak tiakah a Thlarau pumsa kha Pathian sinah maw person dang tein a um ne lai, aa thuh ne kun lai tiah na ruah khawh. A si hrimhrim loh. Khrih Thlarau ka ti tikah Khrih Thlarau kha pumsa dang a si tiin ka chimnak si ti loin amah cu taksa minung le mithi ah a can cang caah khan Khrih Thlarau tiah a hmanmi Bible bia vialte hna cu sunparnak or Thiang Thlarau chimnak tu kha a rak si. Cucaah cun Jesuh zong nih a Pa sinah cun cu sunparnak zong cu a rak hal khah. ( Johan 17 : 5 ). Cun kan hngalh awk a simi cu Pathian cu pakhat lawnglawng a si i amah cu mi vialte kan Pa zong a simi Bawipa Yahweh kha a si. ( Isaiah 44 : 6 )..

✍️ Cucaah Jesuh nih, “A nungmi Pa nih keimah hi a ka thlah i ka nun hi Amah ruangah a si bantukin, keimah a ka eimi zong cu keimah ruangah a nung ve lai,” tiah a kan ti. ( Johan 6 : 57 ). Zeicaahdah Jesuh nih a nungmi ka Pa thawngin ka nung a ti tiah cun Pathian kan Pa a simi Bawipa Yahweh cu thih a thiam ve lomi Pathian a si caah khan a si. Hi kongah hin lamkaltu Paul zong nih, “Pathian lawnglawng cu thangṭhat awk tlak Uktu le siangpahrang hna Siangpahrang le bawi vialte hna Bawi a si. Amah lawnglawng cu thih a thiam lomi, a naih in naih ngam lomi ceunak chung i a ummi a si. Amah cu ahohmanh nih an hmu bal lo, ahohmanh nih an hmu kho lai lo. Amah cungah cun upatnak le thil ti khawhnak zungzal in um ko seh! Amen,” tiah a ti. ( 1Timote 6 : 15{b} – 16 ). Cucaah Jesus cu Pathian kha si loin a thi khomi kanmah bantuk minung hrimhrim kha a si. Cucaah Satan zong nih a tukforh ngam fawn. ( Mathai 4 : 1 – 4 ).

Sihmanhsehlaw Jesus cu Pathian Fapa a si caah khan baptisma a in hnu in cun Pa zong nih Thiang Thlarau hmagin a cungah a um pi zungzal cang caah ( Johan 10 : 38 ) khan Jesuh nih Pathian sinak zong tling tein a ngei ve tihi Bible Cathiang nih a kan cawnpiaknak taktak cu a si. ( Kolose 2 : 9 ). Asinain Jesuh chungah Pa cu Thiang Thlarau hmangin a um ko caah Jesuh nih Pathian sinak a ngeih cang i Pathian zong a si ko ee tiin Jesuh cu Pathian a si tiah kan ti awk hrimhrim a si loh. A ruang cu Jesuh cu Bawipa a si tiah kan ti awktu kha a si. ( Filipi 2 : 11 ). Zeicatiah Pathian cu pakhat lawnglawng a si i amah cu mivialte Pa a simi Bawipa Yahweh kha a si. ( Isaiah 44 : 6 ), ( Exodus 6 : 3 )..

✍️ Hihi Jesuh vawlei a um lio i a thih hlan bia in ka langhtermi a si bantukin hngalhthiamnak taktak zong na ngeih khawh venak lai Pathian kan Pa a simi Bawipa Yahweh nih Thiang Thlarau hmangin hngahfiannak zong in pe ko hna seh. Pathian nih a tha a ti a si ko ahcun Jesuh hi baptisma an ing hlan ah Pa hi a cungah a um maw?” timi bia zong kha kan i hrawm than te hna lai. Zeicatiah cun a zungzal in Jesuh chungah Pa a um tiah a ruatmi kan um caah Jesuh lawnglawng hi Pathian a si ko a timi zumtu si tung i Jesuh kong a hal lomi zumtu kan tam tuk cang caah hin a si. Zeicatiah cun Jesuh nih, “Keimah cu lam le biatak le nunnak a si. Keimah sinin dah ti loim ahohmamh Pa sin an phan kho lo,” tiah ( Johan 14 : 6 ) a ti bantukin Pathian biatak tlintertu a simi Jesuh kong kha kan hngalh lo i kan duhduh in a aumi kan si zungzal ahcun vawlei a tei khomi kan si sual la loh. Zeicatiah zultu Johan nih, “Pathian fa a simi paoh nih cun vawlei kha a tei khawh. Vawlei kan tei khawhnak cu kan zumhnak hin a si. Vawlei cu ahodah a tei kho? Jesuh cu Pathian Fapa a si tiah a zummi lawng nih an tei khawh,” tiah a kan ti caah hin a si. ( 1Johan 5 : 4 – 5 ). Cathiang aa hrawmmi zumtu nan dihkak cungah daihnak Pathian cu um zungzal ko seh..

NOTE : Minung ka si ve caah palh sualnak zong ka ngei ko lai. Chanbaunak zong ka ngei ko lai. Cucaah cun Bible na rel ve ko i Jesuh nih Pathian sinak kal takin vawlei a rat hnu in le thihnak in thawhter a si hlan tiangah khan Jesuh cu Pathian a si ko tinak Bible hna na hmuh sual a si ahcun Comments nakin fian tein i ruah khawh kan si. Duh le messager zongin a ngah ko. Cu si loin Jesuh vawlei ah a rat hlan le thihnak in thawhter a si hnu biafang lakin Jesuh cu Pathian a si hrimhirm ko ee ti duhnak menmen in comments nakah aa thlakmi na si sualah cun Thiang Thlarau ka co lo ti kha fian tein hngal law Jesuh min in Pathian kan Pa a simi Bawipa Yahweh sinah khan a zawkzawk in Thiang Thlarau hal law na caah a tha deuh lai. Cu si loin Jesuh vawlei a um lioah khan le thihnak in thawhter a si hlan ah khan Pathian a sinak hna Bible ah na hmuh sual a si ahcun ka chim law ka rak zoh ve lai cu. Asinain na hngalh awk a simi cu Jesuh chungah Pa a um bantukin le Jesuh cu Pathian fapa a si bantukin Pathian sinak a ngeimitu kha a si. Bawipa ti lawnglawng in auh dingmi a si. Cu ve bantukin kannih zong nih kan zumhnak thawngin le Jesuh cu Pathian fapa a si tiah kan phuannak thawngin hin Pathian cu kan chungah a um ve cang caah khan Pa thawngin cun vawlei ah sunparnak taktak zong kan hmuh khawh venak hi a si. ( Phungthluakbia 17 : 6 ). Zeicatiah Jesuh thawngin Pathian cu kan Pa taktak zong a si ve cang caah khan a sunparnak zong kha a kan hrawmh ve hrimhrimmi kan si cang caah hin a si ee. Amen. ( Rom 8 : 28 – 30 ). Biatak cu nan hngalh lai i cu biatak nih cun an luatter hna lai. ( Johan 8 : 32 )..

Thank You For All;
Johnly Fambawl

Be the first to comment

Leave a Reply

Your email address will not be published.


*