Kei mah cu ka chanchung ka pawcawmnak rian ka ttuan pah in, ka si khawh tawk in ka miphun caah ka pe. Miphun caah a tthehnem lai ti ka ruahmi rian an ka khinhmi le fialmi paoh ah liangkhinh in ka ttuan. Ka pawcawmnak rian in ka dinh hnu tiang hmanh ah rian khinh mi al lo tein ka cohlan i ka ttuan ko.

Ka theithiam u ka miphun hawi hna

Kei mah cu ka chanchung ka pawcawmnak rian ka ttuan pah in, ka si khawh tawk in ka miphun caah ka pe. Miphun caah a tthehnem lai ti ka ruahmi rian an ka khinhmi le fialmi paoh ah liangkhinh in ka ttuan. Ka pawcawmnak rian in ka dinh hnu tiang hmanh ah rian khinh mi al lo tein ka cohlan i ka ttuan ko.

Asinain, tutan rian an ka khinh mi cu lung awttawmnak tampi a ka ngeihter. Khuasau pi ka ruat. Chin mi lak ahcun cathiam ke paza ka si ve tining law ka palh lai lo. Ka phun hawi hna le ka rian ttuan hawi lak zongah hmai dir le zohhlei ka si zungzal. Tutan tucu rian a ka fial tu hna nih an ka helhhumh ning cang ka lung cu a tling deuh lo. Ka miphun caah cun zei rian paoh a poi lo kati ko nain, kei mahnak in an duh deuhmi hna pahnih an helhhum hna i a tlam atlin ti lo hnu lawngah pakhatnak ah an ka chiah tthan.

Ka lungthli te cun ka fahsak ko nain, a lunciami caan ah ka tthutdan le ka sining te kha ka ruah tthan tik ah ka ui tuk fawn. Cucaah, ka phun hawi caah a chungin rian ka ttuan ahcun thil tam deuh tal ka ttuan kho lai, tiah kai hnem i zei dang hmailei kong zong ruàt tuk chih ti loin ka cohlan ko hna. Ka theithiam hram u ka miphun hawi hna.

Asinain….ka theih banh lo mi belte a tam ko.

Rian a ka fial tu hna hi, ka miphun a that a nawng mi hna, ram pumpi mipi le vawleicung mi vialte nih lainawng le mithalo tiah sualphawt mi ansi. Miphun abubu in lainawng in cihmih ai timmi tiah vawleicung biaceih zung pi zong ni tazacuai liomi ansi. Asinain an ka tuhmi thanthling cu a thlum tuk i an ka danghmi sa cu a thaw tuk.

Kan mipi lak le vawleicung mipi hmaika ah an hmaihngal ter sawh men ding ah khin chiahmi ka si. An i tinhmi tlamtlinnak dingah kei mah kut kha hmang in rul tleih le ek tonghter an ka timh mi cu asi. Lai an nawn tik le mi an rawiphir tik ah kei mah min kha an hman te lai.

Thisen an ka neh chih lai. Cu zong cu ka hngalh bu in an bia ka al lo nak hna cu, an thanthling cu athlum tuk i an sa cu a thawt tuk caah asi. Kei mah lei in kai hnemh ve nak cu ka mipi sinah khin thil tha ka tuah khawhnak kha ninghngal in biasawng ka tlorh piak hna lai i thatlonak le ningzahnak a chuah tik paoh ah cunglei nih an ti mi le order an ka pekmi si ti tu in ka pheh te lai.

Asinain, tuchan kum zabu 21 ahcun vawlei cungah lih chim le phehthuh in thil a kal kho ti lo. Chain of Command kha biaceih zung nih ttha tein an dawi i sualphawtnak an ser khawh cang. Accountability ttha tein a um cang. Kan pu le nih mi an thah le lai an nawnnak kha ka duh zong duh lo zongah ka ttuanvo ngeihnak a si chih ve. Ka miphun hawi hna cungah hremnak, khuasual le lainawnnak an tuahmi kha ka duh zong duh lo zongah an ka hrawmh ve. Ka kut ah thi a neh ve lai. Mawh tthatnak ka duh bantuk in mawhchiatnak zong ka tuar ve te hrim lai.

UN le US cozah nih kan pu le pawl sual dawi ding an tuah cuahmah mi ah ka tel colh ve lai. US cozah nih kan ram cu Unusual and Extraordinary National Security Threat Against the United States tiah president Biden nih thanhnak a tuah tik ah, ka pu le pawl cu America ram caah ttihnung mi ral cazin ah chiah ansi. Ramkulh level ah upa bik kasi nak in America cozah i an ral ka si ve ai, ka pu le rian khinhmi thawng in. America rampi nih ral tiah cohlan mi pakhat ka sinak in kei mah lawng siloin ka chungkhar le ka hrihhruai, ka naihniam zong ral an si chih ve. Ka pu le thawng tthiam tthiam.

Kan pu le uknak hi peh tein cansau a nguh ahcun kan nawlngeihnak tang ah mi an tlaihmi, an hremmi, lai an nawn mi le khuasual an tuahmi vial te cu vawileicung nih an zoh sawhsawh te lai lo. Dantaknak le sualphawtnak nih a zulh te lai. Zei caah tiah vawleicung tuanbia ah zeibantuk dictatorship hmanh chanchung a nguh bal lo. Tuchun ka tuahsernak le an rian khinhmi ka cohlannak nih thlapahle bantuk in a ka dawi peng lai. Ka tuahsernak thawngin ka te chin fapar tiang caah tuanbia tthalo ka ttial piak cia hna tluk asi. Ka miphun hawi dihlak nih an duhlo tuknak heh tiah an langhter ko bu ah kei nih kan ral pa caah rian ka va ttuan ve mi cu ka tuanbia ah a ttial lan cang ko lai.

Pasal ka bia khiahnak nih ka mit a ka auter ngam ti lo. Ka lungretheihnak hi ka theithiam u mu ka phun hawi hna. Zei tik tiang dah zan hngilh thiam lo le mi hmai khap loin ka um lai ti ka ruah ah….

Salai Ngun San Aung

Be the first to comment

Leave a Reply

Your email address will not be published.


*