Kaa bochan bikmi zong Bawipa a si

Vawlei cungah hin;-

 

1. Ka uar bikmi cu Bawipa a si..

2. Ka duh bikmi cu Bawipa a si..

3. Ka dawt bikmi cu Bawipa a si..

4. Kaa bochan bikmi zong Bawipa a si..

 

Hlan ah cun mi kong ceih te hna hi ka rak huam ngaingaimi a si ve. Asinain nihin ni ahcun Bawipa kong ceih lawnglawng hi ka huammi a si. Zeicatiah cun minung nih cun kan uarmi hna le kan duhmi hna le kan dawtmi hna an kong ceih cu kan huam bikmi zong a si.

 

Cucu pheh awk tha lo le el awk tha lo bakin a dikmi bia zong a si. Cu bantukin ka uar bikmi le ka duh bikmi le ka dawt bikmi Bawipa kong cu ka ceih zungzal ko lai. Amah cu a zungzal in Kaa bochanmi zong a si caah a si..

 

Cu bantukin dawtmi u le nau hna vawlei cungah hin nang zong nih midang kong va ceih len nakin cun ka dawt bikmi Bawipa kong hi na Facebook tein khan rak ka ceih pi zungzal ve law tiah kan nawl ko hna.

 

Zeicatiah cun Pathian nih ka Bawipa caah a thimmi monu ka si caah hin ka pasal ding a simi ka Bawipa cu kaa uar bikmi le ka duh bikmi le ka dawt bikmi zong a si caah khan a si. Cun amah cu kaa bochan bikmi zong a si fawn. Hika zawn teah hin ka Bawipa tiah ka hmanmi hi na hngal ve hrimhrim awk zongah ka duh rih fawn.

 

Cu bantukin Peter zong nih a rak timi hna cu, “Israel mi vialte hna, nannih nih vailam tahnak thing cungah nan khenh chihmi Jesuh hrimhrim hi Pathian nih Bawipa ah le Messiah ah a ser cang, ti kha fiang tein hngal u,” tiah a rak ti hna. ( Lamkaltu 2 : 36 )..

 

Khrih ah ka dawtmi ka u le ka nau hna Solomon Siangpahrangpa nih a rak timi cu, “Bawipa kha na lung chung dihlak in i bochan law Nangmah fimnak kha i rinh hlah. Na kalnak lam kip ah amah kha hngal law Amah nih na lam kha a tluanter hna lai. Mah mithmuh i a fimmi va si hlah; Bawipa kha ṭih law ṭhat lonak kha mertak ko.

 

Na taksa caah damnak a si lai i na ruh caah si a si lai. Bawipa cu na chawva le na thilri theitlai hmasa bik hna in upat tuah; Cun na rawl inn cu khat thluahmah in an um lai i Na mitsur nennak khor cu mitsur hang in an liam lai. Ka fapa, Bawipa chimhhrinnak cu zei rel loin um hin hlah. An mawhchiatnak nih cun in nor hlah seh, Zeicahtiah pa nih a duhmi a fapa cu a chimhhrin bangin Bawipa nih a dawtmi kha a chimhhrin ve hna,” tiah a rak ti. ( Phungthluakbia 3 : 5 : 12 )..

 

Vawlei cungah hin kan uar bikmi le kan duh bikmi le kan dawt bikmi le kan i bochan bikmi hi Bawipa siseh ti ka duh. Zeicatiah Cathiang zong nih a rak timi cu, “Mi vialte kha ka Thlarau ka toih hna lai i nan fapa hna le nan fanu hna nih ka bia kha an chim lai, nan tar hna nih mang an manh lai i nan tlangval hna nih langhnak an hmuh lai.

 

Khi ni ah cun, sal pa hna le sal nu hna hmanh kha, ka Thlarau ka toih hna lai. Cu ni a rat lai nakding hmelchunhnak hna cu van le vawlei ah ka langhter hna lai: Thisen chuahnak le mei le meikhu tlangtlang an si lai. A lian a ngan i ṭih a nungmi ni, Bawipa ni cu a phak hlanah, Ni cu a mui lai i thlapa cu thisen bantuk in a sen lai. Sihmanhsehlaw Bawipa kha bawmhnak a halmi paoh nih khamhnak an hmuh lai.

 

Bawipa nih a chim bangin, Zion Tlang cungah le Jerusalem khuachung ka khatkhat ah, a luatmi hna cu an um lai. Bawipa nih a thimmi hna cu an nung lai,” tiah a rak ti. ( Joel 2 : 28 – 32 ). Hi a bawmtu ah ( Lamkaltu 2 : 17 – 21 ) kha rak zoh chih..

 

Ka bia dongnak ah chim ka duhmi pakhat te cu ka uar bikmi le ka duh bikmi le ka dawt bikmi le kaa bochan bikmi hi Bawipa a si bantukin nihin ni ah hin nang zong Bawipa aa bochanmi si ve tihi kan duh piakmi cu a si ko.

 

Salm catial Siangpahrang David zong nih a rak timi cu, “Bawipa cu tuukhal bantukin a ka vengtu a si, ka herhmi vialte kha a ka pek dih,” tiah a rak ti. ( Salm 23 : 1 ). Dawtmi u le nau hna vawlei cungah hin kan herhmi vialte a kan pe dihtu le tuukhal bantukin a kan veng zungzaltu Bawipa ah cun aa lawmmi si zungzal ko hna u sih.

 

A biathiang aa hrawm khomi zumtu nan dihlak cungah Bawipa Jesuh Khrih vel le daihnak cu a thar in um zungzal ko seh..

 

Thank You For All;

Johnly Fambawl

Be the first to comment

Leave a Reply

Your email address will not be published.


*