Kanattirih (ကနက်သီရိ) khua ah pyusawthi phu he i kahnak a chuak

Taningtary ramthen,Tayatchawng(သရက်ချောင်း) peng, Kanattirih (ကနက်သီရိ)khua ah pyusawthi phu hna cu meithal kah an tong, minung pahnih an thi tiah khuami hna nih an chim.

 

August 30 zaan suimilam 10:30 hrawngah meithal kah an ton hi a si, pyusawthi phu chungtel tiah theihngai mi U Hlaing Win le a dang minung pakhat an thi,cun minung pahnih hliamh an si tiah khuami hna nih an chim.

 

Thah a tong mi phu hna cu ralhrang nih rianpek mi khuabawi U Naing Moe phu a si,amah cu meithal in hliamh a si caah sizung ah an kal pi tiah khuami hna nih cun an chim.

 

“Meithal puah thawng voi 40 leng kan theih, kaphnih i kahnak bantuk in kan theih” tiah Kanattirih (ကနက်သီရိ) khuaah ummi pakhat nih a chim.

 

Kanattirih (ကနသီရိရှာ) khuaah cun U Naing Moe phu hna nih zaan fatin ngawt in a ruangum lo in meithal an puah tawn tiah khuami hna nih cun an chim chap.

 

I kahnak a can hnu zaan suimilam 1:00 hrawngah ralhrang phu hna cu motor fami 8 in an phan .Motor 5 cu a kir than i, motor 3 cu an taang, zinglei ah lamcung checkhlatnak le tlaihkhih nak an tuah tiah khuami cheukhat nih an chim.

 

Zinglei suimilam4:00 hrawng in checkhlatnak le mitlaihnak cu an thok, khuachung zongah hlathlainak an tuah, khuami minung 30 hrawng tlaih an tong tiah theih a si.

 

Kanattirih (ကနက်သီရိ) khua cuhlan zongah ralhrang phu hna nih voihnih tiang umhmun khuar in an um hnu ah mi tlaihkhih nak zong an tuah caah,mino cheukhat cu an zaam.

Be the first to comment

Leave a Reply

Your email address will not be published.


*