Khrih lungput ngei dingin cawnpiakmi kan sinak a ruang taktak cu

Khrih lungput ngei dingin cawnpiakmi kan sinak a ruang taktak cu

Dawtmi u le nau hna lamkaltu Paul nih, “Nan lungput cu Khrih nih a rak ngeihmi lungput kha si seh,” tiah a kan cawnpiak. ( Filipi 2 : 5 ). Zeicaahdah Khrih lungput ngei dingin cun cawnpiak cu kan si tihi zoh ti hna u sih ti ka duh.

Cu bantukin Cathiang zong nih a timi cu, “Vancung pathian hna nih khin khuaruahharmi thil na tuahmi hna cu hla in an sak hna; Bawipa, zumhawktlak na sinak cu hla in an thangthat,” tiah a ti. ( Salm 89 : 5 ).

Hika zawnah hin vancung pathian hna tiah a hmanmi hi Pathian vancungmi hna kha a rak chim duhmi cu a si. Cucu Our Lord, let the heavens now praise your miracles, and let all your angels praise your faithfulness. ( Psalms‬ ‭89 : 5‬ ‭CEVDCI‬ )..

Dawtmi u le nau hna Pathian vancungmi hna ti loin zeicaahdah vancung pathian hna tiah a hman tihi tlawmpal tein zoh ti hna u sih ti zong ka duhmi a si. Cu bantukin Bible fimnak a ngeimi hna nih an chim tawn ning ahcun Pathian nih vancungmi a ser hna ah hin duhthimnak ngeiin a sermi hna zong an si. Cu tikah Pathian nih ahohmanh ka bia u a rak ti bal hna loh i ka thangthat u ti zongah a rak ti bal fawn hna loh.

Zeicatiah duhthimnak ngeiin Pathian hrimhrim nih vancungmi hna cu a rak sermi hna an si caah khan a si ko. Cu an duhthimnak cu Pathian nih direct in a control hna lo caah khan anmah tein pathian ah i ser khawhnak nawl kha an ngei. Cucu lusifar a dirh hmun in kan hngalhmi zong a si fawn..

Cu bantukin minung kannih vialte hna zong hi Pathian nih duhthimnak ngei in a sermi kan si. Cu kan duhthimnak cu Pathian nih a kan control ve loh. Kan duh a si ahcun Pathian kan biak khawh i kan duh a si ahcun Satan zong kan biak khawh ve ko. Kanmah le kan duhthimnak ah a ummi a si.

Asinain Pathian nih a ka dawt i a Fapa in khamhnak a ka serpiak ti a zummi vialte cu Khrih lungput ngei ding in cawnpiakmi zong kan si. Zeicatiah cun zumhnak thawngin Pathian nih a sunparnak a hrawmhmi kan si. ( Rom 3 : 30 ). Cu sunparnak kan timi cu Pathian nih a thlam in a sinak a kan hrawmh cangmi kha a si i thihnak in thawhthannak ah cun Pathian sinak kha a takin aa hrawm dingmi cu kan si. ( Kolose 3 : 4 ). Cucu Pathian kan lawhnak zong kha a si fawn..

Cu tikah Pathian nih duhthimnak ngeiin sermi kan sinak in sertu Pathian cu lusifar bantukin a sinak kha kan cuh ve lonak ding caah tiin minung kan si lio tein Khrih lungput ngeih ding hi cawnpiak zong kan si ti kha hngal hna u sih ti ka duh. Zeicatiah cun, “Khrih cu Pathian taktak kha a si.

Asinain amah nih Pathian he i tluk kha aa zuam in a tang bal loh,” tiah a ti. Christ was truly God. But he did not try to remain equal with God. ‭‭( Philippians‬ ‭2 : 6‬ ‭CEVDCI‬‬ ). Cu bantukin kannih zong Jesuh Khrih thawngin Pathian fa kan si ve cang caah hin thihnak chungin Pa sunparnak in thawhter kan si tikah cun a takin Pathian nih a sinak zong a kan hrawmhmi kan si ve cang lai caah khan lusifar bantukin sertu Pathian a sinak cuh si loin Bawmtu Thiang Thlarau umpinak thawngin khamhnak a kan serpiaktu Pathian kan Pa le a Fapa ngeihchun a simi Jesuh Khrih kan Bawipa a thangthattu ding kan sinak kha a si. ( Biathlam 7 : 9 – 10 )..

Cucaah cun atu minung kan si lio te zongah hin zumhnak thawngin Pathian chungah kan um aa timi paoh nih cun Jesuh Khrih bantukin kan um awk a si. ( 1Johan 2 : 6 ). Cun Khrih lungput hrimhrim zong kha kan i ngeih awk cu a si. ( Filipi 2 : 5 ). Zeicatiah Jesuh Khrih thawngin Pathian kan Pa a simi Bawipa Yahweh nih hngalhthiamnak kha a kan pek cang caah khan amah cu kan do lo awk le kan pialtak fawn lo ding kha a si. ( Isaiah 50 : 5 ).

Dawtmi u le nau hna Khrih lungput ngei dingin cawnpiakmi kan sinak a ruang taktak cu timi bia aa hrawm zumtu kan dihlak vialte cungah Fimchimtu Thiang Thlarau nih kan thinlung mit kan auter ve cang sehlaw cuticun a biathiang a simi Bible Cathiang bia zong hi fiannak taktak kan pe cio ko seh. Amen. Ka chimmi hi tha tein ruat law, Bawipa nih zeizong vialte hngalhthiamnak an pek lai ee. ( 2Timote 2 : 7 )..

Thank You For All;
Johnly Fambawl

Be the first to comment

Leave a Reply

Your email address will not be published.


*