KNLA Brigade 5 Ah Ralhrang He I Kahnak Ah Ralhrang 20 An Thi August 17 in 20 tiang nili chungah KNLA Brigade 5 ah ralhrang he i kahnak voi 30 a chuak i ralhrang lei in 20 an thi 3 hliam an tuar.

KNLA Brigade 5 Ah Ralhrang He I Kahnak Ah Ralhrang 20 An Thi

August 17 in 20 tiang nili chungah KNLA Brigade 5 ah ralhrang he i kahnak voi 30 a chuak i ralhrang lei in 20 an thi 3 hliam an tuar.

KNLA hmunhma Dutathu pengkomh Brigade 1,Tawngngu pengkomh Brigade 2 le Ngianlepin pengkomh Brigade 3 ah ralhrang nih cawlcanghnak an tuah caah i kahnak a chuahnak hi a si.

Relpeh
Ralhrangbu Nih Kachin Ram Internet Line An Phih

Ralhrangbu Nih Kachin Ram Internet Line An Phih Kachin ramkulh chung internet le phone line vialte cu ralhrangbu nih nizaan August 20 zan suimilam 10 in an phih dih tiah theih a si.

Ralhrangbu nih Internet line pek khawhnak tower 50 leng i internel line vialte cu August 20 zaan suimilam 8 in chah dih dingin nawl an kan pek tiah Telenor riantuantu pakhat nih a chim.

Ralhrangbu nih an phih ter mi ah Mobile internet, Fibre internet le Broadband hna zong a tel.Nawl an chuah hnu suimilam 10 hnu in internet line vialte a cat dih, Phone line zong a ngah ti lo tiah Hpakanh mipi nih an chim.

Telenor riantuantu pakhat nih line phih an duh ahcun ca chuah lo zongah phone in an kan chawnh i, suimilam pakhat hnu, suimilam cu zat ah rak phit uh tiin nawl an kan pek lengmang mi a si ko tiah a chim.

Ralhrangbu nih an phih mi ah Telenor line pakhat lawng si lo in a dang mobile operator hna zong an phihter dih hna tiah theih a si.

Ralhrangbu nih operation le timh mi pakhat khat a um tikah phone le internet line hna hi an phih lengmang mi a si. 2017-2019 chung Rakhine ram kahdohnak lio zongah pehtlaihnak an tuah khawh lo nak ding le lenglei thawngpang a chuah lo nak dingah internet le phone line vialte caan saupi an rak phih piak hna.
Ref; DNA

Relchap
NUG radio line kong ah bawmhchanhnak a um ahcun hmalak nan si lai tiah ralhrang phu nih an thanh

(NUG) nih an chuahmi radio line kong ah bawmhchanhnak a um ahcun phungning in hmalak nan si lai tiah ralhrang kuttang runvennak zung nih nihin ah ralrin pek nak ca an chuah.

Cu an langhter mi ahcun Radio NUG min in 2021, August 20 ah test nak in an thlah mi radio line cu Ministry of Information nih phungning in a thanh mi radio line a si lo caah ,lungtlin pi nak um lo in an riantuannak ah riantuan pi in bawmhchanhnak nan tuah ah cun hmalak nan si lai tiah an tial.

NUG i radio thlahnak caan cu August 20 ni ah thlah hram an thok i,Radio NUG nih thlahmi caan ah thawng ngeih khawh cio nak ding in dawrkip ah radio caw tu hna zong an tam.

Ralhrang phu hna nih dawr ah zuar mi radio hna cu chuhpiak ding in le China ramin radio kuat mi zong rikhiah piak ding in nawl an chuah, cun Yangon khua Bukalay dawrlam lei sakamung(စဂမုန်းပွင့်ကုန်တိုက်)ah zuarmi radio hna cu an lak tiah theih a si.

Radio NUG nih thlah mi cu August 20, zaan suimilam 8:00 ah voikhat, voikhat an thlah ah minute 30 chung an thlah, radio an thlah nak phun cu 10 Band Digital Radio in Shortwave meter 16/VHF 17.71 in ngeihkhawh a si cang lai tiah NUG nih thawng an thanh.

Relchap
Magway vanlawng lei ralkap minung 36 an hriam he an zaam

Magway vanlawng lei ralkap minung 36 cu an hriam he an zaam cang , an humhim nak hmun ah an phancang tiah a thli ralkap phu chungtel pakhat nih a chim.

Magway vanlawnglei ralkap umnak sakhan ah August 8 ah puahkeh nak a chuak, cuhlan zongah bomb in puah an rak tong cang.

Security thatuk in chiahnak hmun vanlawng lei ralkap sakhan pakhat chung bomb puahnak kong ah Bitanoe(ဗိဿနိုး) hmunhma mipi vengtu phu hna nih tuahmi si tiah cathanh an chuah.

Bitanoe (ဗိဿနိုး) hmunhma mipi vengtu ralkap cu Magway le an hmunhma he pehtlaih mi Tawngdwingyi (တောင်တွင်းကြီး) peng ah a bik in cawlcanghnak tuah mi phu an si.

Ralhrang uk duhlo in (CDM)cawlcanghnak a tuah mi, ralbawi hna le ralkap hna cu (NUG) cozah nih bawmhnak a pek khawh ah cun thlakhat chungah ralhrang phu in a chuak dingmi ralkap 500 hrawng an um tiah theihternak ca an chuah.

Relchap
Yakhine ah minung sing 2 leng Covid-29 sii chunh an si cang tiah ralhrang phu nih a chim

Yakhine ramkulh chung COVID-19 zawtnak
runvennak sii chunhnak nawl a ngei mi hna chung in minung sing 2 leng cu COVID – 19 runvennak sii chunh an si cang tiah ramkulh ngandamnak lei Assistant Director Dr. Soe Win Paing nih Mizzima ah a chim.

Cu an chunh mi hna cu India ram chuahmi COVID – 19 runvennak sii (COVIDSHIELD) le China ram nih chuahmi COVID – 19 runvennak sii phunhnih cawh in an chunh mi hna a si.

India ram nih chuahmi COVID – 19 runvennak sii chunh cang mi 120000 leng le China ram chuah mi COVID – 19 runvennak sii chunh cang mi hi 95000 leng an si tiah Assistant director Dr.Soe Win Paing nih a chim.

“India ram chuah mi runvennak sii cu April,May,June ah khan chunh an si, cun China nih chuahmi runvennak sii cu July le August thla ah hin chunh an si,voihnih chunh an si cang ” tiah a chim chap.

Yakhine ramkulh COVID – 19 third wave chung August ni 20 tiangah zawtnak hmunmi dihlak hi 3763 an si, nunnak a liam mi hna hi 360 an si cun,sizung in a tum cang mi hna hi 412 an si cang tiah ngandamnak lei nih an thanh.

Yakhine ramkulh chung ah Stay at Home ding cu August 25 tiang sauh chap a si tiah AA nih thawng a thanh.

Relchap
Serchhip Ah Nupa Tuahkhat Nih Minung 50 Leng An Hlen Hna

Mizoram, Serchhip khuapi dinthar vengah a um mi Jenny Malsawmthangi te nupa nih minung 50 leng bank in phaisa an cawi ruangah palek nih an tlaih hna i hlathlainak an tuah hna lio a si.

Serchhip police SP chim ningah, Jenny Malsawmtluangi nih hin kum 2017 thawkin 15% miak um in phaisa cawinak hi a rak tuah. Tangka a cawimi hna sin ah thla 2 le cheu hrawng cu a miak hi tha tein a rak pek tawn hna.

Tukum May hrawng thawkin phaisa a cawimi hna sin ah a miak a pek ding hna cu a pek khawh ti hna lo lengah an phaisa cawimi (deposit) zong an lak khawh ti lo ruangah August 19 zaan suimilam 7 hrawngah Jenny chawdawr cu an bauh i, a leiba aiawh ah tiin a dawr thil cu an lak.

Hi buainak kong he pehtlaih in palek nih an hlathlai tikah minung 50 leng nih an tangka chiah mi hi an lak ding mi a miak (interest) hi sing 500 hrawng a phan tiah theih a si.

Jenny nih hin a phaisa cawimi hi riantuan taktak nak ah hman lo in phaisa an chiah mi chungin mi cheukhat interest (amiak) pek nak caah a hman tawn tiah theih a si.

Serchhip palek nih phungninglo in mi phaisa a cawitu Jenny Malsawmtluangi te nupa cu palek sakhan ah an hruai hna hnuah an inn zong check piak an si.A tangka cawimi cazin zong zeihmanh a ngeihlo pin ah Bank account a hman mi zong cawlter kho lo dingin a chiah dih tiah theih a si.

SP nih tangka hi a miak he phawt than ding ahcun cozah theihpinak a hau i, a si khawh chungin hlathlainak kan tuah lio a si. Mah bantuk phungninglo in tuahmi phaisa cawinak lakah mipi cu ralrin dingin bia a cah.
Ref; lenkawl

The Chin Post

Be the first to comment

Leave a Reply

Your email address will not be published.


*