Mindat khuami pahnih cu lam kan hmuhsak u, tiin SAC ralkap nih an tlaih hna

Mindat khuami pahnih lam kan hmuhsak u, tiin SAC ralkap nih an tlaih hna

August 13

August 13, 8:50 AM ah Mindat Peng Baw (3) khuami minung pahnih cu SAC ralkap nih lam kan hmuhsak u, tiin an tlaih hna, tiah kan theih.

Hi SAC ralkap pawl nih hin lam kan chim u. Nan kan zulh lo i nan kan chimh lo ahcun nan khua innlo mei in kan khangh/duah lai, tiah an thihphaih hna, an hrocer hna i minung pahnih cu an tlaihbeh hna tiah Mindat khuami Shane Aung Maung nih a tial.

August 13 thiamthiam ah Mindat Peng Maungchaung le Shiat khua pawng ah SAC ralkap minung 100 hrawng an phan than tiah theih a si.
====

Thawngdang
Moekoh ah tlangmincim nih minung 7 a chilh/khuh hna, pa 5 le ngakchia 1 dam tein an chanh manh hna i minung 1 cu an kawl lio a si.

Hihi ruahpi fak a pehpeh in a suur ruang ah a si i August 13 zing ah a cang mi a si.

Crd Tachileik News Agency
===

Thawngdang
“Wa” hmunhma ah phungluut loin a luut i COVID-19 hmuh mi le he aa pehtlai mi thihdan pek timh

“Wa” (Mahte Khuakhan lairelnak Nawlngei mi) hmun ah phungluutlo a thlithup in a rak luut mi sin in COVID-19 zawtnak hmuh a si ahcun a dam tiang thlopbul hnu ah aa tlak ning in dantat si lai.

Hihi Cozah ramri lei in siseh, Tlangcung hriamtlai dang hmunhma zong in siseh, atulio COVID-19 boruak lio ah Wa hmun ah luh kan duh lo, tiah cathanh an chuah.

Cun, Wa ah rak luut ding in a bawmtu hna cu kum 20 in kum 30 thongtlak an si lai i hi thil a tuah hramhramtu cu thih tiang thong asiloah thihdan pek an si lai.

Cun, Wa hmunhma ah riithaisii a phur i a zuartu cu biaceih zong a um lai lo. Thahcolh a si lai tiah cathanh an chuah tiin People Media nih a langhter.
===

Lunglawmhnak
Hakha Za Hoe lam (Matupi lam) ah Pi Ni Mah te chungkhar nih July thla ca an dawrkhaan hlangtu chungkhar 3 dawrkhaan man an kan dawt.

Atulio boruak le harnak lak ah zawnruahnak he dawrkhaan man an kan dawt mi cu kan i lawm tuk. Pathian nih thluachuah pe chin ko hna seh.

Dawrkhaan hlangtu chungkhar hna
====

Lunglawmhnak
Atulio kan ton cuahmah mi COVID-19 zawtnak a zual lio caan ah Saya Thawngpi (IBC Pastor) nih Hakha Tita lampial Dawrkhaan man a kan dawt.

COVID-19 a voi 1nak lio zong ah Dawrkhaan man a kan dawt bal cang i a cung ah lunglawmhnak tampi kan ngei.

Dawrkhaan Hlangtu
The Hakha Times
=====

Thawngdang
India North-Eastern States chungin palek 9 nih “Union Home Minister’s Medal for Excellence in Investigation” an hmuh.

Union Home Minister’s Medal for excellence in investigation ” Cu 2021 kum chungah palek 152 sinah pumpak in pek an si. Hi medal hi 2018 kum ah thawk a rak si i, aa tinh bik mi cu sual hlatnak kong i tthanchonak ding le sual a hlat-hlai tu police officer hna thiamnak(sual hlat hlai i) theihpiak nak ding i ser mi a si.

North-Eastern states chung i hi awards pumpak I a co/hmu tu hna cu :

1. Smt. M Priyadarshini Devi W/SI – Manipur
2. Shri V L Chama Ralte, SI – Mizoram
3. Shri Bibekanand Das, SSP – Assam
4. Dr. Rashmi Rekha Sarmah, DySP – Assam
5. Shri Sukumar Sinha, Insp – Assam
6. Shri Dipankar Gogoi, SI – Assam
7. Shri Banraplang Jyrwa, DySP – Meghalaya
8. Shri Temsuyangba Ao, UBSI – Nagaland
9. Shri M. Harsha Vardhan, Addl. DCP – Arunachal Pradesh

Mizoram News
===

Thawngdang
Thai Ram Ah Online In Hriamzuar Mi Meithal (3500) le Kuan Nuaikhat An Tlaih

Thai Ram Ah Online In Hriamzuar Mi Meithal (3500) le Kuan Nuaikhat An Tlaih
Thai Ram Ah Online In Hriamzuar Mi Meithal (3500) le Kuan Nuaikhat An Tlaih

Thai ram Khokan le Chinyian ah Online in hriamzuar mi minung pathum le meithal 3500 le kuan nuai khat hrawngah he August 11 ah tlaih an si tiah theih a si.

Hriamzuar tu hi kum 38 mi pa pakhat cu Khokan ah tlaih a si i,pakhat kum 43 hrawng mi pa pahnih hi Chinyian ah tlaih an si.

Khokan ah tlaihmi pa pakhat i a inn ah Refill 1414 le,Pistol 122 le kuan 920,000 an tlaih i,Chinyian i an tlaihmi hna sin in Refill 1786 le,Pistol 224 le kuan 57500 an tlaih tiah theih a si.

Indonesia, Shweden,American,Turkey, France,China ram ah hriamnam hi kuat ding asi tiah theih a si.

Hriam cawknak Website chungah fakthanh an tuah i a caw duh tu hna nih Line i chungah lut in tangka in zuar le cawk mi a si.

Hi hriamzuar hi kum nga chung an tiah cang i ram kip in a cawduh tu thong sawmnga hrawng an si,nikhat ah hriam a thong leng an zuar tiah theih a si.

Bangkok Post
====

Thawngdang
Aizawl Office Rian Kan Thok Cang

Kan hnulei ah kan ran thanh cang bangin TCP nih Mizoram khuapi Aizawl ah office kan on i rian zong kan thok khawh cang. A Kạn bawmtu Kạn naule hi media lei ah hmuhtonnak a ngei bal rih lomi an si caah tlamtlin lonak tete a um lengmang. Mipi nih nan kan ruah thiam ko lai tiah ruahchannak kan ngei. Tha chin lengmang dingin kan i zuam cuahmah ko.

TCP hi media in tangka lut a ngei lomi mah thazaang le dawtu cheukhat hna dawtnak in ram le miphun caah rian a tuanmi kan si. Mipi bawmhnak, dirkamhnak le thazaang peknak kan herh peng ko.

Kan tlamtlinlonak zawn ah lungthiang tein ruahnak nan kan pek ding zongah kan in nawl hna. Na pawngkam ah a cangmi zeibantuk thawngpang paoh pehtlaihnak kan tarmi phone number ah nan kan than cio ding zong kan in sawm fawn hna. Cun fakthanh (caw-ngia) na duhmi a um ahcun a lak in fakthanhnak kan in tuahpiak khawh.

TCP riantuantu hna cu US, Australia, Korea, Myanmar le Mizoram hna ah kan um. TCP riantuantu hna cu A tanglei bantukin kan si.

*Salai CP Lian (CEO)
*Salai Elvey Siang (Admin)
*Salai Robert Biak Cin (Editor in Chief)
*Salai Sui Lian Cung (Computer & Camera)
*Salai Mg Lay (Journalist)
*Mai Anna Par (Journalist)
*Mai Flowery Par (Journalist)
*Mai Maruat Fambawl (News Presenter)
*Mai Ngun Bor Iang (News Presenter)
*Mai Tha Chin Sung (Host)
*Mai Biak Tha Chin (News Presenter in Burmese)

Kawlholh in thawngchim hi niruk zaan poah ah a si lai. Tu thla chungah cun Kawlholh hi kan thok kho ri lai lo. Hmaithla in thok khawh kan i zuam lai. A tanglei bantukin zinglei le zaan thawng chim caan cu a si lai.

Live Thlah Caan

Zing : 9:00 – 10:00 am (Mizoram)
: 10:00 – 11:00 am (Myanmar)
: 10:30-11:30 pm (US Central Time)

Zaan: 8:00 – 9:00 pm (Mizoram)
: 9:00 – :10 pm (Myanmar)
: 8:30 – 9:30 am (US Central Time)

Note: Sunday cu kan i din lai.

Thawng chim caan kan tarmi chungah vawleicung hmunkip ah a ummi Chin miphun hna sinah TCP nih nifatin tein a dikmi le theih a herhmi thawngpang kan chim peng lai. Thazaang nan kan pek cio dingah kan i ruahchan.

Lunglawmhnak le ruahchannak he…!
TCP Team
August 13, 2021 (Friday)
====

Thawngdang
Ralhrang bawihlun U Tan Shwe le a nupi Daw Kyine Kyine cu Covid-19 zawtnak an i chawn tiah theih a si

Kawlram ralbawi hlun a si mi U Tan Shwe le a nupi Daw Kyine Kyine (ဒေါ်ကြိုင်ကြိုင်) cu Covid-19 zawtnak an i chawnh caah zarhhnih hrawng sizung ah umdawh an si tiah thawngzamhnak pakhat nih August 12 ah a chim tiah AP thawngzamhnak ah an langhter.

Ralbawi hlun a si mi U Tan Shwe le a nupi Daw Kyine Kyine an pahnih in coronavirus zawtnak an hmuh hna hnu ah a luancia mi nithum li hrawng ah Naypyidaw Teihchawng(သိုက်ချောင်း) sizung ah an um tiah min langhter lo mi sizung riantuan pakhat nih a chim.

Atu ah an pahnih in security tampi hna he sizung VIP room pakhat ah thlopbul lio an si tiah,min langhter lo mi sizung riantuan pakhat nih a chim.

Amah nih rampi a uk chung ah,amah nih a hruai mi nawlngeihnak la tu ralkap phu hna a dohtu hna cu fakngai in hremnak le, Daw Aung San Su Kyi tel in ramkhel lei a dohtu hna cu thongthlak nak a rak tuah hna.

Ralkap minung 400000 hrawng ralkap phu pakhat cu a hruai hna i, cu ralkap phu hna le tlangcung hriamtlai phu hna kar ah i dohnak a rak um ,2007 buainak a chuah lio ah hruaitu dirhmun in a rak um mi phungki hna le university sianghngakchia hna lei ah meithal tinh in hramhram mi then cheu nak a rak tuah.

Mizzima
======

Thawngdang
Palek anmah le mah meithal in an i kap palek Corporal pakhat a thi

Palek anmah le mah meithal in an i kap palek Corporal pakhat a thi A luancia August 11 zaanlei ah palik anmah le mah meithal in an i kah caah palik Corporal pakhat a thi tiah khua mi hna sin in theih a si.

Meithal in a kap tu le nunnak a liam mi palik pahnih hna cu Pantawng khua ah rian khinh an si nak a sau rih lo, a thi mi palik Corporal hi Naypyidaw mi a si i, a kap tu hi Pawngte khua mi palik a si tiah a chim.

An pahnih in khua dang ve ve in a rak phan mi an si, an phanhnak a sau rih lo, palek sawh nih palek Corporal cu a kah.

An pahnih in khua dang ve ve in a rak phan mi an si, an phanhnak a sau rih lo, palek sawh nih palek Corporal cu a kah.

Myaelatt Athan
===

Thawngdang
Yangon sii chiahnak 19 cu phukip fonh nih checkhlatnak an tuah tiah ralhrang nih a thanh

Yangon sii chiahnak 19 cu phukip fonh nih checkhlatnak an tuah tiah ralhrang nih a thanh Yangon sii chiahnak hmun (ဆေးဂိုဒေါင်) 19 cu phukip fonh nih checkhlat nak an tuah tiah nawlngeihnak la tu ralhrang phu nih a thanh.

August 11 ni ah sii chiahnak( ဆေးဂိုဒေါင်) 24 cu checkhlatnak in an phih hnu ah, August 12 zongah checkhlatnak an tuah tiah theih a si.

Ni tin zuar le cawknak a don khan lo nak ding ah, sii zuarnak hmun le phohte pek nak dawr hna cu check lo in, a dangten chiahnak hmun sii chiahnam(ဆေးဂိုဒေါင်) hna cu checkhlatnak an tuah tiah a langhter.

Checkhlatnak an tuah nak sii chiahnak hmun chung in, sii man kaiter ding ah ruahchih in sii khong mi hna,cawknak le zuarnak cazin a langhter kho lo mi hna, khon mi a tam caah sii man cawhdek in timh ciammam ten sii khong mi an um caah phung ning tein hmalak nak tuah a si lai tiah a chim.

Tuahkel ten a zuar tawn mi sii chiahnak hmun hna cu minthut ter an si lai i, tuahkel ten a zuar tawn mi company hna cu zei ti hmanh in tuah an si lai lo tiah a cathanh mi ah a langhter.

Checkhlat nak tuah lio ah thilzuar nak hmun ah kuat le chiah an duh a si ah cun an thilri le chiah nak ding hmunhma cu cinken in zalong ten kuatnak nawl pek an si tiah an langhter chih.

Cu bantuk checkhlat nak an tuah hnu ah mipi hna sin in hman a tam mi sii-ai hna cu thei hngal te in a man a tum tiah an langhter chih.

Checkhlat tu hhna cu peng ukzung,Palek,hlathlaitu,eidin zohthlainak,peng sipin he fonh im veng uktu hna le sii chiahnak ngeitu hna hmai ah checkhlat a si tiah an langhter.

DVB
The Chin Post

Be the first to comment

Leave a Reply

Your email address will not be published.


*