Minkin Ah Ralhrang Nih Khuami An Thah Hna, An Ruak Chindwin Tiva Ah An Hlonh

Minkin Ah Ralhrang Nih Khuami An Thah Hna,An Ruak Chindwin Tiva Ah An Hlonh

Minkin(မင်းကင်း) ah ralhrang phu hna nih Kyautkhetat(ကျောက်ခဲတက်) khuami pathum cu an thah hna hnu ah an ruak cu Chindwin tiva ah an hlonh

Sagaing ramthen,Minkin peng Kyautkhetat (ကျောက်ခဲတက်) khua mi minung pathum cu ralhrang phu hna nih an thah hna leng ah an ruak cu Chindwin tiva ah an hlonh hna tiah khuami hna nih an chim.

Khuachung thawngzamhnak ThinGaDoneNews nih langhter ning ah nizaan August 17 nih ah Pansat tawngphyu(ပန်းဆက်တောင်ဖြူ) um pyusawthi phu hna le ralhrang phu hna nih Kyautkhetat (ကျောက်ခဲတက်)khuachung ah an luhhnawh hna hnu ah mipi hna cu an tlaih hna, August 17 ni ah U Boe Awng(kum-60) le Ko Phoe Tauh(kum-26) hna cu an thah hna hnu ah an ruak cu tichung ah an hlonh .

“Thah a tong mi minung 3 ruak cu Chindwin tiva ah an hlonh hna i, an ruak cu ti cung ah a vuan tiah a hmu tu hna nih an chim.Tlaihkhih an ton zong khua mi hna nih an hmuh hna, an thah mi hna ruak cu langhter lo in thuhnawh an timh.Thah a tong mi hna hi khuami mi sawhsawh te an si ko ,PDF zong an si lo” tiah khuami pakhat nih Khit Thit Media ah a chim.

Ralhrang phu hna cu Minkin khuate lei ah lut in an thilri zong hrawh piak in an lak piak hna ,mipi hna cu a ruang um lo in an thah hna tiah theih a si.

Khit Thit Media
===

Thawngdang
Afghanistan Cozah Bantukin SAC Cozah Zong A Rawk Ve Lai: CDM Ralbawi Pahnih

Kan theih cio bantukin US ralkap an chuah lecangka in caan raulo teah Afghanistan ram pumpi cu Taliban nih an lak ko. Hi kongah vawleipi a khuaruah a har. Afghanistan cu kum 20 chung US nih a ralkap le tangka billion tampi dih in a um hnawh, a kilven. Hi kum 20 chungah Afghanistan cu a him. Asinain US ralkap an chuah lecangka in Taliban nih fawi tukin an lak khawhmi cu khuaruahhar lo awk a tha lo.

Afghanistan cozah nih hriamtlai ralkap singthum leng a ngeih hna. Cu vialte cu US nih kum 20 chung fimthiamnak, raldohnak le tangka in a bawmh hna. Asinain rampi a veng khomi ralkap tha ah an i ser kho lo. US nih Afghanistan cozah sinah Taliban pawl hi tha tein zoh hna tiah ralrin a pek tawn ko nain ralkap singthum leng kan ngei ko, zei an kan ti kho lai lo tiah an daithlang sual. US ralkap an chuah in a thla hmanh a tlin hlan ah pei cozah bawi hna cu ui le ar bangin an zam dih ko hi!

Hi Afghanistan cozah rawhnak he Myanmar ram dirhmun cuaithlai in CDM a tuahmi Boci Min Maung Maung nih cun a tanglei bantukin a chim. “Afghanistan ah democracy cu a rawk cikcek cang. Cozah le a ralbawi hna eihmuarnak, an kuttang minung hna hlennak, ralkap chung lungruallonak, cun a biapi bik cu mipi nih tha an pe hna lo. Hi vialte zoh tikah Afghanistan ralkap le atu i SAC dirhmun hi aa khat bakmi a si. Khatlei in zoh tikah Taliban nih ramkhel an kalpi ning cu ka duh bak lo. Asinain ral an doh ningcang cu ka uar ngai. Zeitlukin a thawngmi ralkap a si zongah, ram ngan hna nih an dirkamh len zongah hriam hme tete hmangin tei khawh an si ko, war strategy (စစ်ရေးဗျူဟာ) in tei khawh a si, cun mipi thapeknak zongin tei khawh a si ko” tiah a chim.

Myanmar ramkhel kong hlathlaitu U Than Soe zong nih Afghanistan cozah le SAC ralhrangbu cu eihmuarnak ah an i khat bak tiah a chim. “US nih kum 20 chungah Dollar billion 80 leng a bawmhmi ram, thlakhat chungah singthum leng a simi ralkap a rawk i cozah tungtlang dihlak a cim dih timi cu khuaruahhar taktak khi a si. Cozah cu eihmuarnak in a khatmi an si, ralbawi hna zong eihmuar hmang lawngte an si. Taliban he kahdohnak ahhin doh len hau loin Afghanistan cozah ralkap hna cu an hriam chiah in an tli viar. Zei thiamnak hmanh a ngei lomi ralkap an si. Cucaah Taliban nih thlakhat chungah fawitein an khuapi Kabul an lak khawhnak a si. Atu i Myanmar dirhmun zong hi cu bantuk cu a si ko lai. NUG Cozah runvennak vuanci nih tlangcung hriamtlaibu hna le mah le pentlang/hmunhma cio ah dirhmi mipi vengtu ralkap hna he i bawm in D-Day a thanh tikah cun a rau bik thla hnih/thla thum chungah hi ralhrangbu cu a rawk hrimhrim lai. Cutikah cun SAC Actors (minta) pawl cu China le Russia ah an zam len ve te ko lai tiah ka zumh” tiah U Than Soe nih a chim ve.

Afghanistan ralbawi hna nih a um lomi ralkap cazin kha an tuah i an thla hlawh pek dingmi tangka tampi an i lak tiah theih a si. Cutluk cun eihmuar an thawng ve.
CDM a tuahmi Boci Lin Htet Aung nih Bohmuci Min Aung Hlaing hruaimi ralhrangbu hna an donghnak ni cu hmuh khawh a si cang, tiah a chim ve.

“Zeitluk in an thawn zongah a biapimi cu ralkap dirhning tungtlang, cunglei bawi hna riantuanning le hruaining hi a si. Hihi a dik lo a si ahcun a ngan tukmi ralkapbu zong an rawk ko lai. Mahzawn lawng aa ruatmi ralbawi hna riantuannak nih Afghanistan ralkap khi a hnorsuan tuk hna lai tiah ka zumh. Kan ram ralkap zong mah bantuk khi an si ko. Cunglei bawi hna hi mahzawnlawng aa ruatmi an si. Tanglei ralkap hna cawnnak, ukhruainak le raldoh ningcang thanchoter i timh loin cozah sin in an hmuhmi budget le a dang tangka hna cu anmah ca lawngah an hman. Cu bantuk ralkap cu Afghanistan ralkap bantukin an dong ko lai tiah ka zumh. A zei lei paoh ah an tla tuk cang i a rauh hlanah an donghnak ni a phan hrimhrim lai” tiah CDM a tuahmi Boci Lin Htet Aung nih cun a chim.

RFA
===

Thawngdang
Phekhung PDF Ralhrangbu Mei Line An Hrawh

Phekhung PDF Ralhrangbu Mei Line An Hrawh Karenni , Lawpita hydro power plant in Nawpyitaw ah a kal mi mei hri cu Phekhung PDF nih bomb an puahnak cu PDF nih an thanh.

PDF nih an hrawh mi hi Naypyitaw lei a kal mi, Phekhung le Pinlawng peng kar Lwehe pawngah a um mi Lawpita No.3 sehzung tower pahnih a si.

Hi Electric tower hi mipi nih hmanmi a si lo, ralhrangbu lawng nih an hman dingin an tuah mi a si caah rian an tuan khawh lo nak dingah bomb in kan puah mi a si tiah PDF Phekhung nih an langhter.

Phekhung PDF, Mobyet PDF, Loikaw PDF, Dimawso PDF, Naypyitaw PDF le PDF southern Shan State phu 6 hna hi hawikom ah an i ser hnuah tlangcung hriamtlaibu pawl he ralhrangbu a dongh tiang kan do lai tiin August 16 ah cathanh an chuah.

The Chin Post

Be the first to comment

Leave a Reply

Your email address will not be published.


*