Minung nih Saram he kan i tahchunhnak kongah hin

Minung nih Saram he kan i tahchunhnak kongah hin;-

🙏 Khrih ah dawtmi u le nau hna kan biachim ah siseh, Pathian thawngtha bia in dinfelnak kong kan chim ah siseh saram he hin kan i tahchunh tawnmi hi a dik lo taktakmi a si tiin ka hmuh. Sualnak in a khatmi minung nih hin Saram kan tluknak bak hi ka hngal hrimhrim loh. Hna theihnak zongah kan tluk hna loh. A rai lai dingmi thil kong hngalh chungnak zongah kan tluk hna loh. Asinain kannih nih cun kan i thawh i Saram bangin kan duhduh in nupa sualnak kan tuah i kan duhduh in fa zong kan ngei hna tiah kan ti tawn. A palh taktakmi a si. Minung cu Pathian nih Eden dum in a thawlmi a si. Saram cu Pathian nih a thawl ve hna loh ti zong kha kan hngalh awk a si..

🙏 A taktak tiah cun sualnak in a khatmi minung hna nih hin Fapa Jesuh Khrih zumhnak in Pathian dawtnak kan hngalh taktak tung lo ahcun Saram he a tahchunh ngam dingmi kan rak si hrimhrim loh. Hal phuah thiam nih a timi, “Saram fa hmanh tluk lo minung kan si rua,” tiah a timi hi kan si. Unau Saram he kan i tahchunhnak bik hi nupa sinak ah hin a si bik tawn. Asinain Saram nih hin cun an phol caan te lawngah hin nupa sinak hi an tuah tawn. Pathian nih Saram cu hngalhnak zong a pek ve hna lo caah ningzak an hngal loh. Minung tu cu amah muisam kengin le amah loin sermi kan si pinah hngalhnak a kan pek caah hin ningzak zong kan hngalh. Cucu te cu kan minung le Saram kan i dannak a si..

🙏 Bible cacaang ka talh lai lo nain Bible tha tein a relmi na si ahcun na hngalh ding zongah ka ruahmi a si. Minung bak nih hin Saram nawl cawn in zeitik hmanh ah nupa sinak kan tuah lo. Hi kongah hin Saram zong kan tluk fawn hna loh. Zeicatiah cun Saram nih nu le nu, pe le pa tiin sualnak an tuah bal loh. Minung nih hin cun nu le nu, pa le pa tiin sualnak hi kan tuah. Saram nih cun an phol caan te lawngah nupa sinak hi a tuah. Minung nih cun a rem caan paoh ah nupa sinak hi kan tuah. Saram nih mi nupi, pasal a chut bal loh. Minung nih cun mi nupi, pasal hna hi kan chuh hna. Unau ruat ko hmanh u sihlaw Saram maw an sual deuh? Minung hi dah kan sual deuh? Saram hmanh a tluk lomi minung kan si kha i hngal hna u sih ti ka duh..

🙏 Saram hmanh a tluk lomi minung nih Saram he kan i tahchunh lengmang vemi hi mi mak taktak kan si. Pathian nih a Fapa Jesuh Khrih in khamhnak kan ser piak hlan ah hin minung le Saram hi aa tluk bak te kan si. Asinain sualnak tuah ah cun Saram nakin minung hi a sual deuhmi kan si. Asinain Jesuh Khrih zumhnak thawngin Saramnak in a sunglawi deuhmi cu minung hi kan si fawn. Zeicatiah cun minung cu Jesuh Khrih thawngin Pathian fale kan si. Pathian fa a si taktak cangmi minung nih hin Pathian duhnak hi kawl ve cang hna u sih. Zumhnak kongah hin kik tung lo, lum tung loin kan vai i um hnu ah le kan duhduh in kan sual hnu ah hin kan tluk hna lomi Saram he kan duhduh in kan i tahchun tawnmi hi cu Pathian hna zong kan tla lai loh tiah ka ruah..

🙏 Cucaah cun dawtmi u le nau hna minung nih Saram he kan i tahchunhnak kongah hin khua hi fak deuhin ruat ta hmasa hna u sih ti ka duh. Zeicatiah Jesuh Khrih ah zumhnak taktak kan ngeih tung lo a si ahcun minung nih Saram kan tluknak hi pakhat te hmanh a rak um lo caah khan a si. Unau zumhnak in Jesuh Khrih kan i ngeih taktak tung lo ahcun kanmah le kan ka tein cun Pathian fa kan i ti ve ko nain sualnak kongah kan rak i tahchunh zungzal tawmmi Saram lila hi kanmah minung lila bak nih hin kan rak tluk hna lo ti kha kan thih hlan lo i hngal cang hna u sih ti ka duh. Asinain Bawipa Jesuh Khrih thawngin Saran nakin ka sunglawi deuh ti le vancungmi hna nakin ka sunglawi deuh ee ti kha ka i hngalh taktak a si ahcun Thlarau in Khrih chungah um in pakhat le pakhat tu kha i dawt zungzal ko u sih..

🙏 Careltu nan dihlak cungah Fimchimtu Thiang Thlarau nih hngalhfiannak zong kan pe cio ko seh..

Thank You For All;
Johnly Fambawl

Be the first to comment

Leave a Reply

Your email address will not be published.


*