Minung pakhat thawng in Khrihfabu pakhat, khua pakhat, ram pakhat a ṭhancho khawh bantuk in sa pakhat kah thawng in ramriak an hlawh a tling kho.

Ram Hruaitu Pakhat Ruang ah

Laimi nih phungthluk kan ngeihmi cu “Mi pakhat thawng, sa pakhat thawng” ti a si.
Minung pakhat thawng in Khrihfabu pakhat, khua pakhat, ram pakhat a ṭhancho khawh bantuk in sa pakhat kah thawng in ramriak an hlawh a tling kho.

Bible hi ka rel ve lengmang tik ah hruaitu ṭha lu bik pakhat thawng in miphun pakhat cu thluachuah an hmuh bantuk in hruaitu ṭha lo lu bik pakhat ruang ah harnak ton khawh a si.

2 Samuel 24 chung ah David nih a miphun Israel le Judah minung a rel hna. Keimah/kanmah ti thinlung put an ngeihnak an langhter. A ngaingai ti ah cun ral an teinak le hlorh a sinak cu Pathian thawng in a si. Pathian tu thangṭhat lo in anmah le anmah an i thangṭhat, an i hlorh kha Pathian thinhunnak a si.

Cucaah Pathian nih profet Gad in David siangpahrang a halmi bia cu “Na ram chung i kum 3 mangṭam maw, na ral hna sin in thla 3 zaam maw, na ram chung i ni 3 rai tlun dah na thim lai?” (V-13) ti a si. Hi dantatnak thim ding hi hrial khawh a si lo caah David nih aa thimmi cu ‘ni 3 chung rai’ kha aa thim tik ah minung 70,000 (thong 70) bak an rak thi. Siangpahrang David sual ruang ah a rammi thong 70 an thi.

Ram hruaitu ṭha lo lu bik sual ruang ah ram chung ah rai le pul a tlun hi Bible ning cun khuaruahhar awk a si lo. Ram hruaitu ṭha lu bik ruang ah ram pakhat a va ṭhancho i rammi an i lawmh zong khi Pathian rianṭuannak a si ko.

Hruaitu si hi a biapi hringhran ko, kan thluachuah hmuhnak hram le harnak le fahnak kan huahnak hram a si.

Maw Pathian, hruaitu ṭha kan pe ko sawh!

# Ho ti duhnak si lo, Bible bia a simi tu kha chim duhmi a si.
# Kan vawlei pum cu thah khawh si ko hmanh seh, kan thlarau pum cu Pathian nih a ngeihmi a si.
# Hi nunnak in KHI nunnak ah ṭhial kan si sual zong ah Jesuh sin tu ah um ding in i ready hna usi.
# Pathian kan zumhnak fek ko seh. Amen.

Credit – Taan Mang

Be the first to comment

Leave a Reply

Your email address will not be published.


*