Na Sual Laifangah Thi Awla Van Na Kai Kem?

Na Sual Laifangah Thi Awla Van Na Kai Kem?

Mi hrekkhat cu na sual laifangah thi awla, Van na kai kem? tiih kan suh tikah kai lo ding, na țhatlaifang ah teh? Kai ding… kan ti țheu.

Sual laifangih thihih hremhmun, țhat laifangih thihih Vanram kai dingih kan ruatawk cun Rundamnak thu hi kan fiang ngaingai lo tinak a si.

“Hi thil hi i sim hnik uh: Pathian Thlarau nan comi hi Daan ih a lo fialmi nan tuah ruangah maw, asilole Thuthangțha nan theihnak le nan rinnak in so nan ngah?.(Galati 3:2)

Sualnak a phunphun kan tuah ruangah hremhmun tla ding kan si loih Sual man thihnak ihsin in rundamtu Jesuh Khrih zum lonak ruangah Hremhmun tla ding kan si sawn.

Cuvek thotho in Vanram khal hi kan fel,kan țhat, kan thianhlim le kan rinum ruangah kai ding kan si loih Rundamtu Jesuh Khrih kan zumnak ruangah kai ding kan si.(Ef 2:8-9)

Jesuh Khrih ah Pathian in mifel lo kan si cingin mifel ah mi borhbah kan si cingin mi thianghlim ah in pom. Halleluijah…

“Amah Pathian ruangah nannih cu Khrih Jesu ah nan um. Khrih cu Pathian hnen ihsin kan hrangah fimnak, dingfelnak, thianhlimnak le tlennak ih tuah a si”.(1Cor 1:30)

Na Pai fa na sinak hi a thu ih nan um can lawngah si loin a thu ih na um lo can khalah na pai fa na si thotho.

Pathian fa kan sinak hi a thu ih kan um can lawngah si loih kanmai thu ih sual kan tuahlai khalah Pathian fa kan sinak a danglam cuang lo, a fa kan si thotho.

“Pathian in leilung hi a duhdawt zet ruangah a Fapa neihsun a pek ih amah a zumtu hmuahhmuah cu thi loin kumkhua nunnak an co ding”.(Jn 3:16)

Zokhal thianghlimten, felten, rinumten a umtu cu a ti loih a zumtu cu Kumkhuanunnak an co ding a ti a si. Halleluijah….

Rundamtu Jesuh Khrih na zum hnuhnu cun na țhat canih na thih khalah țhat lo canih na thih khalah van na kai thotho ding.

Na fel laifang ih na thih khalah na sual laifang ih na thih khalah Van na kai thotho ding.

Cuti asile Pianthar hnuah sual tuah a poi lo tinak maw si? Si lamhlam hlah.

“Asile ziangtinso kan ti ding? Pathian ih zangfahnak karh sinsin seh tiah sual kan tuah vivo hrih ding maw? Tuah naisai hlah! Sualnak ah kan thi zo ih ziangtinso a sungah kan um thei nawn ding?”(Rom 6:1-2)

“Pathian fa zokhal in sual a tuah rero nawn lo, ziangahtile Pathian nun zia kha thlaici bangin a sungah a um. Cule Pathian cu a Pa a si ruangah sual in a nung nawn lo”.(1 Joh 3:9)

Credit – Lal Hre Luai
Edit : Hmanthlak ka taar mihi kuakzuk liau asi. Zangfah nak tein kuak azu mi nan um ahcun phundang in rak ka ruah piak hram hlah umu.

Be the first to comment

Leave a Reply

Your email address will not be published.


*