PDF နှင့် CDM များကို ထောက်ပံ့ပေးနေသည်ဆိုကာ ပိတ်သိမ်းမည့် KBZ pay အကောင့်စာရင်းလျို့ဝှက်စာပေါက်ကြား

PDF နှင့် CDM များကို ထောက်ပံ့ပေးနေသည်ဆိုကာ ပိတ်သိမ်းမည့် KBZ pay အကောင့်စာရင်းလျို့ဝှက်စာပေါက်ကြား

 

မဇ္ဈိမ/ သြဂုတ်လ ၂၄ ရက်

 

ပြောက်ကျားတပ်ဖွဲ့များနှင့် အနုနည်းဖြင့်အာဏာဖီဆန်သူများကို ငွေကြေးကူညီထောက်ပံ့နေသည်ဆိုကာ ယာယီပိတ်သိမ်းရန် စစ်ကောင်စီကညွှန်ကြားသော KBZ pay စာရင်း လျို့ဝှက်စာသည် ပေါက်ကြားလာခဲ့သည်။

 

မဇ္ဈိမက ရရှိထားသည့် ပြည်သူ့ကာကွယ်ရေးတပ် (PDF) နှင့် စစ်အာဏာရှင် ဖြုတ်ချရေးတွင် အဓိကကျသည့် အခန်းကဏ္ဍတစ်ခုဖြစ်သည့် CDM ဟု လူသိများသော Civil Disobedience Movement လုပ်သူများကိုထောက်ပံ့သည်ဆိုသောစာရင်းများတွင် တန့်ဆည် CDM Support Team၊ PDF Support၊ Donate & Open Your Heart၊ Let’s Donate And Take A Remedy စသော အမည်များနှင့် တယ်လီဖုန်းနံပါတ်များပါရှိသည်။

 

ဘဏ်အကြီးတန်းအရာရှိတစ်ဦးက ပိတ်သိမ်းသည့်စာရင်းမှန်ကန်ကြောင်းနှင့် အာဏာသိမ်းစစ်တပ်ကညွှန်ကြားထားချက်ဖြစ်ကြောင်းပြောသည်။

 

တန့်ဆည် CDM Support Team ကလည်း ” အလှူငွေလက်ခံတဲ့အကောင့်ပိတ်ခံလိုက်ရပါတယ်။ ၁၉ရက်နေ့ ညပိုင်းမှာ ပိတ်ခံရတာ စသိတာပါ။” ဟု မဇ္ဈိမကိုပြောသည်။

 

အမျိုးသားညီညွတ်ရေးအစိုးရ (NUG) က ရောင်းချနေသော နွေဦးထီဝယ်ယူခြင်း၊ တစ်ဆင့် ရောင်းဝယ်ခြင်း၊ ငွေလွှဲခြင်းများ ပြုလုပ်နေသည်ဟုယူဆသော KBZ pay အကောင့်‌ ၄၀ ကို ဆိုင်းငံ့ပိတ်ပင်ပြီး အကောင့်ပိုင်ရှင်များ၏ သတင်းအချက်အလက်များကို ပေးပို့ရန်လည်း ညွှန်ကြားထားသည်ဟု ဘဏ်အသိုင်းအဝိုင်းကရှိ သတင်းအရင်းအမြစ်က မကြာသေးခင်က မဇ္ဈိမကို ပြောထားသည်။

 

အကောင့်များသည် level 2 ဖြစ်ခြင်း၊ ငွေလွှဲရသည့် အကြောင်းအရာ ရေးသားဖော်ပြချက် (Description)တွင် နွေဦးထီနှင့် ပတ်သက်သည့် အကြောင်းအရာများပါခြင်း အစရှိသည်တို့ကို အဓိက စစ်ဆေးကာ ပိတ်ခိုင်းကြောင်း သိရသည်။

 

တော်လှန်ရေးအင်အားစုများ၏လူထုအတွင်းလွှမ်းမိုးမှုကိုလျော့ပါးစေရန်ကြိုးပမ်းမှုအဖြစ် စစ်ကောင်စီတပ်များက ရန်ကုန်နှင့်အခြားမြို့ကြီးတစ်ချို့တွင် အသံချဲ့စက်များနှင့် လိုက်လံအော်ပြောနေမှုများရှိနေသည်။

 

ယမန်နေ့နေ့လည်က ရန်ကုန် စမ်းချောင်းမြို့နယ်တွင် ဝါဒဖြန့်ချိမှုတွင် PDF များနှင့် အမျိုးသားဒီမိုကရေစီအဖွဲ့ချုပ် (NLD) အဖွဲ့ဝင်များသည် အကြမ်းဖက်သမားများဖြစ်ကြောင်းနှင့် ကိုဗစ်ကာကွယ်ထိန်းချုပ်ရေးကိုနှောက်ယှက်ဖျက်စီးနေသူများဖြစ်သဖြင့် လက်မခံကြရန်ပါရှိသည်။

 

 

Be the first to comment

Leave a Reply

Your email address will not be published.


*