Ralhraang Pawl An Rak Luh Ah Cun Phomh Ding In Ready Bak Kan Si

Ralhraang Pawl An Rak Luh Ah Cun Phomh Ding In Ready Bak Kan Si

Karen National Union (KNU) Bridage-1 hna an cawlcanghnak Tahtone district chungah Min Aung Hlaing ralhraang pawl thazaang an chap thluahmah ko nain kahdo ding in an rak luh ah cun kan nih lei zong nih kap be ding in ready bak kan si tiah KNU Bridage-1 in ralbawi pakhat simi nih a chim.

Nizan August ni 16 ah khan Mon ramkulh Bilee peng, Moe Kaung le Kyeikhtoo lei ah Min Aung Hlaing ralhraang pawl tamlak te an rak chiah hna, uknak chut tu ralhraang phu nih KNU Bridage-1 do ding in timhlamhnak an nei ti hi a fiang ko, an rak luh ah cun kan phomh bak ve ko hna lai, ready bak kan si tiah KNU ralbawi pakhat nih cun a chim chap.

Ralhraang tamlak te a phur tu motor 16 hna cu nizan August ni 16 chun ah khan Mawlamyaing khua in Tanlwin hlei an tan hnu ah Tahtone khua lei ah an kal thluahmah, ralhraang pawl an tam ngai ngai, KNU Bridage-1 lei ah kal ding an si ko lai tiah khuami hna zong nih an chim.

A luan ciami August ni 11, kum 2021 zan ah khan Mon ramkulh Paung myone chung ummi KNU Bridage-1 hna an sakhan le an zung cu ralkap pawl an pu ruak hngah an kal kar ah ralhraang pawl nih an rak luh hnawh i ralkap pahnih le khuami 12 an rak tlaih hna.
==

Thawngdang
Yangon Ah Dalan Pa A Cal Padar Bak Ah Thilak An Kah

Yangon ramtthen, Mamayut peng, sang number-3, Htandapyin lam le Sedanatuh timi lam aa tonnak pawng, inn number-17 ah ummi, ralhraang sin thawng petu dalaan pa Tin Hla cu tuni August ni 17, kum 2021 zing suimilam 5:00AM hrawng ah khan a ho ti theih khawh rih lomi hna nih meithal in thilak an kah tiah Kamayut Information thawngzamh nih a langhter.

“Zing suimilam 5:00AM hrawngah khan an inn pawng ummi pakhat nih a chimnak ah cun au thawng kan theih i kan va zoh cu a calpadaar bak ah an rak kah i a thi cang” tiah mit bak in a hmu tu sangmi pakhat nih a chimmi char in Kamayut Information thawngzamh phu nih an langhtermi cu si.

Hi kong he pehtlai in Yangon Khit Thit Media nih Kamayut sang ah ummi pakhat sin ah thawngpaang halnak an tuah tik ah thah a tongmi hi ralhraang sin thawng petu dalan pa Tin Hla timi si, an thah timi kong cu a dikmi si ko, ralhraang le palik pawl zong an motor in an rak phanh kan hmuh hna tiah a chim.

Tin Hla hi dalan si tiah mipi nih cun an chim nain Yangon Khit Thit Media nih a dang tein fehternak cu a tuah kho ve rih lo, zing suimilam 8:00AM hrawng ah khan Htandapin lam ah ralhraang motor pakhat, double cap motor pa 5, private motor pakhat he ralhraang pawl 30 hrawng an rak phan.
====

Thawngdang
Ralhraang Khanhmi Khuabawi A Lu An Tan, Dalan Pakhat Thilak An Kah, Piosawtthi Pakhat Thilak An Kah Rih

Sagaing ramtthen chungah Min Aung Hlaing ralhraang phu nih an khanhmi khuabawi pa a lu an tan, ralhraang sin thawng petu pakhat meithal in thilak an kah, Mon ramkulh Yee myone chungah piosawtthi chungtel pakhat thilak in an kah fawn, khat lei ah sualnak nei lo mipi chung in minung pathumnak tlawm lo ralhraang nih an thah ve hna.

Sagaing ramtthan, Myoeng myone, Tatthekung timi khua ah Min Aung Hlaing ralhraang paw nih khuabawi rian an khanhmi Aung Myint cu nizan August ni 16, zan suimilam 7:20PM hrawng ah khan Hnalunghhlah misual phu timi nih a lu an tan, a mah he hmunkhat ah ummi piosawtthi chungtel pakhat zong faak ngai in an hliam.

Cun Mon ramkulh Yee myone Asin timi khua ah nizan August ni 16 zanlei suimilam 6:00PM hrawng ah khan piosawtthi phu chungtel pakhat simi U Ko KO (kum 50) cu a ho ti theih lomi nih meithal in thilak an kah, cu lawng si loin Sagaing ramtthen, Shwebo district, Tanhse khua, Metdamyaing timi sang ah ralhraang sin thawng petu simi siidawr nei tu Aung Nay Myozong nizan August ni 16 zing suimilam 9:00AM hrawngah khan sii caw ding in rammi minung pathum hna nih meithal in thilak an kah.

Meithal in thilak an kahmi Aung Nay Myo hi Tanhse peng USDP Hlutdaw Palai nau pa a si bantuk in ralhraang nih uknak an laak hnu ah ralhraang lei ah ttang in a thlithup in thawngpaang petu zong a si. Sagaing ramtthen Hteekyeik peng Myanmar CNICO Takaung Metal cawhnak sehzung ah rianttuan tu pahnih hna cu nizan August ni 16 zanlei suimilam 6:00PM ah khan meithal kahnak in an thi ve.

Cun Mandalay ramtthen, Pin Oo Lwin district, Matdaya peng ah NLD ttanh tu mino pakhat simi Ko Kyaw Thu Oo zong a ho ti theih lomi nih an thah, ralhraang an si lai tiah zumh a si, Sagaing ramtthen, Yinmabin district, Pale myone, Monywa-Gangaw motor lam cung, meng 52 timi khua pawng zongah lutan mi ruak phanh an hmuh, a mah hi 55 meng khuami Ko Aung Myo Thet a si.

Chin 24seven Newx

Be the first to comment

Leave a Reply

Your email address will not be published.


*