Ralhraang Uknak Duh Lo In CDM Tuah Tu Ralkap 1500 Hrawng An Um Cang

Ralhraang Uknak Duh Lo In CDM Tuah Tu Ralkap 1500 Hrawng An Um Cang

Min Aung Hlaing nih a mah nawl neihnak duh tuk ruang le i hruh pi chih tuk ruangah mipi thimnak cozah sin in uknak a laak hnu in thla 6 a hung rauh tik ah a ralkap hna chung lila in ralkap uknak doh lo ruangah CDM tuah tu ralkap 1500 hrawng an um cang tiah ralkap umnak in chuah le zaam a duhmi hna sin ah bawmhnak petu ralkapbawi Lin Htet Aung nih a chim.

A tu bantuk in ralkap sinak chuahtaak in a zaammi 1500 hna lak ah hin a tam deuh cu range nei lo le senthum dirhmun in ralkap rianttuan tu hna an si, cun Major dirhmun in ralkap a chuahtaak tu hna zong hi 100 hrawng cum an um cang, felfai deuh in ngiat le zohfel an hauh caah an dihlak in ral dohnak lei ah cun kan kal ter hna lo.

A si nain an mah le an ti khawh tawk cio in ram le miphun caah rian an ttuan cio ve ko hna, a luan ciami June thla ni 15 tiang hrawng ah khan cun ralkap chung in CDM a rak tuah tu hna hi 800 hrawng lawng an rak si, thlahnih chung ah a tu bantuk in CDM tuah tu an hung karh thluahmah tik ah kan mah zong kan i lawm ngai tiah ralbawi Lin Htet Aung nih cun a chim chap.

Kum 29 simi ralbawi Lin Htet Aung hi Defense Services Academy (DSA) siangin 54 in a dih hnu ah Shan ramkulh nichuah lei battalion 528 ah Deployment (ttat khua hmu) dirhmun in rian a ttuan hnu ah a luan ciami April thla, kum 2021 in khan CDM a rak tuah.

CDM a tuah hnu zongah ram le miphun caah a si khawh chung in rian a ttuan, ralkap thar pawl training a pek hna bantuk in Min Aung Hlaing kut tang in chuah le zaam a duhmi hna zong biatak tein bawmhnak a pek hna.
===

Thawngdang
Oxygen Seh Cawknak Ah Tiin Ralhraang Nih Khuakhat Ah Kyat 1000000 In An Hal Hna

Irrawaddy ramtthen, Thar Paung peng ah oxygen seh cawknak ding le sehzung saknak ding caah tiah uknak chut tu le mipi that tu ralhraang phu nih an kut tang rianttuan tu simi pengukbawi zung in khuate pakhat ah Kyat 1000000 cio in phaisa nan kholh hna lai tiah sanguk bawi le khuabawi hna sin ah nawl an pek hna caah pek lo ngah lo ti bak in phaisa cu an kholh cuahmah hna.

Hi kong he pehtlai in Tapaung khuami pakhat nih “khuabawi te nih khuakhat ah Kyat 1000000 in nan thawh dih lai tiah hraam hraam in an hal hna, an hei chimnak ah cun bawmhnak pek bantuk khi si ko, a si nain khuadang hna bantuk in oxygen sehzung an sa tak lai maw sa lo ti zong fiang tein theih khawh si lo, tu hi zawtnak zong a zor cuahmah bantuk in Pathein khua zongah oxygen sehzung pa 5 a um cang,

Khat lei in chim ah cun a thar sak ti lo zongah a poi lo khi si, mah cu an mah phaisa hmuhnak ah tiah ralhraang nih khuami hna sin in an kholh ter hnami si ko, ralhraang nih penguk zung an fial hna, penguk zung nih sanguk bawi le khuate khuabawi pawl an fial chin hna, a dik ning tein chim ah cun phaisa kholh khi si ko cuh” tiah a chim.

Tapaung peng hi phungning loin thlor thing an chuah tam ngai nak peng a si bantuk in sanguk bawi hna le khuate khuabawi hna zong hi phungning lo le a thlithup in thing a chuah tu le phaisa in lentecelhnak (lawngkasa) a tuah tu hna sin in ralhraang pawl caah phaisa khawl tu an si hna tiah khuami hna nih an chim.

The Chin Post

Be the first to comment

Leave a Reply

Your email address will not be published.


*