SAC ralkap nih thurhnawmh mi le hrawk mi Falam Peng “Taal” khua Baptist Church a thar in Pathian sin pekchanhnak an tuah.

 

SAC ralkap nih thurhnawmh mi le hrawk mi Falam Peng “Taal” khua Baptist Church a thar in Pathian sin pekchanhnak an tuah.

 

Hi pekchanhnak hi August 28 ah Falam Christian Ministers Fellowship (FCMF) hruainak in an tuah mi a si, tiah Chinland Herald DAILY News nih a tial.

 

Falamin

Pathian hnen Țaal Baptist Church Ap Saalnak An Tuah

 

Falam Christian Ministers Fellowship (FCMF) tawlrelnak in Pathian hnen Țaal Baptist Church ap saalnak cu August 28 (tuni) zinglam nazi 10:00 am ihsin an tuah tiah CH in kan thei. Falam ihsin rongbawltu Pators 40 lenglo cu mawtaw 12 thawn Țaal khua ah feh in biakinn thianhlimnak hrang Pathian hnen thlacam ap saalnak an neimi a si.

 

FCMF sungțuan Rev. Peng Hlei Iap in khawmnak a hruai ih Rev. Thawng Awi in thoknak thlacam, Rev. Ye Aung, Rev. No Tin Cuai le inntek kawhhran pastor Rev. Thawng Ir pawl in thu tawi simnak, Rev. Thang Za Khum in khua le kawhhran hrang thlacamnak, Rev. Dr. Joel Za Hlei Kap in Bible, hlabu le biakinn hrang thlacamnak pawl an nei ih Rev. Dr. Law Ha Ling in Țahhla 5:1-6, Saam 55:16-19 tiang siar in thuthangțha simnak, Rev. Hrang Than Fel in tirawl hrang thlacamnak le Rev.F. Thiam Uk in thluasuah peknak pawl in caan an hmang tiah theih a si.

 

Țaal khua ah innkhi 36 a um ih mipum 160 hrawng an um tiah khuami pakhat in a sim. Amah cun, “kan khua ah Kawl ralkap pawl vei hnih an lut zo, hmaisa țum ah tla siatduah kan tong na’n August 9 ih zaan 5 sung țum hnihnak an ratmi ahcun kan sungralmi a tam tuk. Ahleice in kan biakinn thianghlim in borhbah sakmi le Bible, hlabu pawl duhdah tak ih in hlon sakmi pawl hin kan in naa ter cuang” tiah CH a sim.

 

FCMF hotu Rev. Dr. Joel Za Hlei Kap khal in, “atui’ kan thil tonmi hi Țaal khua lawng, Baptist kawhhran lawngin kan tuarmi a si lo. Chin miphun zate le zumtu Christian zate in kan tuar a naami a si ruangah kawhhran tinkim ih Pastor zate ra in Pathian hnen thlacam apnak kan tuahmi a si” tiah a sim ve. Falam Baptist Association (FBA) zung in tuțum ih Pathian hnen biakinn ap saalnak hrangah vok that in sathi lonnak tla an nei. Inntek kawhhran pastor Rev. Thawng Ir in, “atu bangtuk in pengpi rori in thlakung in ra zawnmi cun kan beidongnak pawl ah ruahsannak thar in nei ter saal ih kan lungawi tuk” tiah a sim.

 

FCMF cun August 19, 2021 ah Kawl ralkap pawl in Țaal Baptist Church an borhhlawh termi an dem thu, lehhnu ah cubangtuk tuah nawn lo dingin an theih ter thu cu thupuang an rak suah zo. International Chin Affairs (ICA) pawlkom khal in Țaal khua ih tontuarnak cipciar ngan in Kawl ralkap ih cangvaih dan an dem thu thannak an rak nei ve.

 

FCMF cu 2003 ah Falam khuapi sungih rongbawltu pastor pawl thawn dinmi pawlkom a siih Țaal Baptist Church cu April 12, 2019 ah biakinn thar onpuai an rak tuahmi a si tiah CH in thuthang kan ngah.

 

Chinland Herald Daily News

Be the first to comment

Leave a Reply

Your email address will not be published.


*