Salai Ngun San Aung: CDM Atuah Mi Vialte Upat Peknak le Nawlpat Nak

Salai Ngun San Aung: CDM Atuah Mi Vialte Upat Peknak le Nawlpat Nak

CDM atuah tu nulepa hawile vialte hna, khat lei kap in CDF ai awh in nan hmai zong kan i khap hna lo ti zong chim ka duh ko, nan harsa tuk hrim ko lai. Mizeihmanh rian kan tuan kho lo, kan i hlawhfa kho ti lo. Khuate  ah lo a tuah mi, rian a ttuan mi dah ti lo cu kan harsa tuk hringhran ko hna lai. A si nain Pathian nih Ti le Rawl loin cun an kan chia hram lai lo timi ruahchannak ka ngei ko.

CDM tuah in Mizoram lei ah aa dor mi hna zong, Mizoram a um mi kan Laimi hna nih siseh, Mizoram kan unau si hna seh, a kapkip in faak pi in zohkhenh nak an tuah timi kan theih tikah kan i lawm i, khat lei in kan hna zong a ngam deuh ngai.

CDM a tuahtu vialte, nan mah hi kan keeng ruh taktak cu nan si ko.  SAC ralkap, Uico Cozah a nun khawh lonak ding, a tluk khawhnak ding ah nanmah CDM pawl hi nan biapi tuk. Nan mah pawl nan kir tthan i rian nan tlaih tthan sual ahcun, nan fanau le hna nih thisen le nunnak pek in hriam kan tlaih mi vialte hi a lak a si ko lai, sullam ngei lo ah aa chuah ko lai.  Cu pin ah Ralkap tei khawhnak ding ah kum tamtuk kan rau than lai i kan tei kho ti lai lo.

Meithal kuanfang bantuk in CDM hi a biapi timi zong nan theih cia a si ko nain ka vun nolh than duh. Kan i bochan tuk hna, kan i upat tuk fawn hna, hi Cozah rian nan hmuh khawhnak ding caah kum zeizat riamruam dah sianginn nan kai, Phaisa nan dih timi kan ruah, nulepa U le nau le chungkhar cawm nak ding caah hi rian hi nan i thim i zeitluk harsa in dah nan rak luh timi kan theih.  Cun hi rian in nan chuah than tak tikah zeitluk in dah a har lai timi ka theih ko. 

A si nain nan hnu lei ah mipi kan um ko timi zong kan cah duh ko hna. Cun mipi vialte lawmh zawnh lio ah ka rak chim cang bantuk in CDM a tuah mi hna hi an lahkhah bantuk in kan bawmchan kho hna lai lo, an herh ning tluk in zeihmanh kan bawm kho hna lai lo.

Sihmanh sehlaw na pawgkam ah CDM a tuah mi an um ahcun Ti hraikhat te le, na fang pawngkhat te kha rak hrawm ve hna law, kan har ah kan har ti hna lai, kan ttam ah kan ttam ti hna lai, kan khim ah kan khim ti hna lai,  cu ti cun nun i hrawm hna usih law, kan uanu CDM pawl hi lungdong in Cozah rian ah an kir than lo nak ding ah biatak tein i dirkamh, i bawm cio hna usih.

Note: Online biaruahnak ah video in a chim mi asi, mipi theihtlak, thazaang peknak bia a si kan ti caah Cafung tein kan rak tial tthan mi asi…..VOA Journal

Be the first to comment

Leave a Reply

Your email address will not be published.


*